A investigadora María Mosquera (USC) localiza o gran reto da restauración galega: sacar partido real do dixital
luns, 9 de outubro do 2023
María
Mosquera Leal, investigadora da Universidade de Santiago, é a
responsábel dun traballo que pon de manifesto o importante potencial
das ferramentas dixitais para a hostalería galega, potencial que
aínda está por explorar e cuxo aproveitamento práctico é o gran
reto do sector para os vindeiros anos.
Na
investigación faise saber que “unha boa parte da restauración
galega non concede credibilidade ás plataformas de opinión como
TripAdvisor e tampouco coñece o impacto estatal e internacional dos
seus clientes nin profunda nas ferramentas de mercadotecnia dixital”.
Na
introdución ao traballo engádese que na actualidade en Galicia dáse
o paradoxo dun escaso aproveitamento dos servizos tecnolóxicos
avanzados, e pola outra, dunhas administracións públicas que seguen
a enfocar a gastronomía galega como un dos recursos turísticos máis
valiosos identificando Galicia co bo comer e empregando a gastronomía
como factor clave na promoción do destino turístico.
As
devanditas son dúas das principais conclusións que achega a tese de
doutoramento da xornalista e investigadora da Facultade de Ciencias
da Comunicación da USC, María Mosquera Leal, dirixida polo profesor
Fermín Galindo.
A
tese pon o foco, tamén, na xestión da reputación, no ecosistema
actual da comunicación gastronómica, na rápida transformación que
experimentou a valoración do cociñeiro e no impacto da
telerrealidade e das plataformas de recomendación na alta
restauración galega. Amais, abórdase por primeira vez en Galicia a
análise do impacto da reputación na gastronomía e o relato
gastronómico que se fai da alta cociña galega.
“A
gastronomía é unha das principais motivacións do/a turista para
elixir Galicia, despois da natureza”, relata a investigadora,
engadindo que descubrir a imaxe que nos chega da gastronomía galega
e, sobre todo, coñecer como impactan as valoracións dos clientes
nas redes sociais ou os influencers no relato gastronómico
galego, foron dous dos detonantes principais dun traballo no que
analizou a evolución da comunicación gastronómica ao longo do
tempo, antes exclusivamente en mans de críticos culinarios e agora
“democratizada” a través das puntuacións das plataformas como
TripAdvisor.
“Interesábame
coñecer de primeira man como influíra ese cambio nos negocios
hostaleiros, especialmente na alta restauración galega, se facían
uso das redes sociais e as ferramentas de mercadotecnia en liña ou
tiñan profesionalizada a comunicación dos seus establecementos, nun
momento no que a cociña ocupa o prime time nas televisións
estatais e os cociñeiros parecen ser as novas estrelas do rock para
a nosa sociedade”, explica María Mosquera. Algo no que a
investigadora establece que se deron pasos adiante, pero que aínda
queda moito por facer, sobre todo profundando na análise de toda a
información que os usuarios xeran en Internet sobre cada
establecemento e o alcance que podería chegar a ter non só para o
sector, senón para o destino Galicia.
A
investigación complétase cunha vintena de entrevistas a figuras da
restauración, crítica e fotografía gastronómica, así como a
responsábeis de diferentes entidades vinculadas á formación e á
promoción turística. De todas elas, así como da análise dos
comentarios nas diferentes redes sociais e plataformas, a
investigadora extrae que “o potencial para usar estas ferramentas
que atraen o público internacional non está de todo desenvolvido”.
Así, sinala, as materias pendentes neste eido abranguen a formación
e sensibilización ao sector sobre o potencial das ferramentas de
comunicación en liña, máis alá de redes sociais xerais, e o peso
que teñen as plataformas dixitais de recomendación á hora de
situar un restaurante. “O conxunto da información xerada polos
usuarios é hoxe en día unha peza crucial á hora de lograr unha boa
reputación nos seus establecementos e atraer novos clientes
internacionais, polo que sería necesaria máis formación neste
sentido para as novas figuras da restauración”, afirma.