A nova plataforma cultural e alternativa Revervas.com preséntase este domingo en Santiago
venres, 13 de xuño do 2014
Este domingo a praza de
Cervantes de Santiago vai dar acubilla á presentación dunha nova
plataforma galega de índole creativa. Máis polo miúdo, abranguendo
a parte da cultura que máis lonxe se manifesta dos circuítos
oficiais. Trátase de Reverbas,
plataforma de difusión de contidos artísticos e culturais de
actualidade. O acto de presentación está previsto para as 18.00
horas e contarase coa presenza do equipo responsábel da posta en
marcha desta iniciativa e de accións complementarias de celebración
cultural, como por exemplo a plasmación dun graffiti en vivo da man
de De festa en festa.
Reverbas nace como un
Traballo de Fin de Grao do curso 2013-2014 de quince estudantes de
Comunicación Audiovisual da Universidade de Santiago de Compostela
(USC) que verá a luz nos vindeiros días na ligazón www.reverbas.com.
O seu propósito é “o de sacar á superficie toda unha cultura
xuvenil subterránea que non prospera nos medios tradicionais de
difusión”, sinalan. A plataforma encamíñase basicamente a
satisfacer a demanda de contidos “novidosos e de calidade” de boa
parte do público galego. Por certo que o nome de Reverbas é un xogo
de palabras que vai dende a reverberación do son ata a fonética
inglesa de reverb us, termo que significa “fainos eco”,
“difúndenos”.