A novena ICC Week deixou sete días de actividade nunha ducia de localizacións de Ourense
mércores, 26 de abril do 2023
A
Deputación
de Ourense celebrou os días pasados a novena edición da semana ICC
Week, adicada a mostrar a puxante actividade das industriais
creativas provinciais, galegas e estatais, poñendo o foco en ámbitos
como as novas tecnoloxías, os videoxogos, os contidos, a arte urbana
ou a música. Este luns 23 de abril celebrouse a última xornada no
evento. Nela o presidente da Deputación, Manuel Baltar, expresou a
súa satisfacción polo éxito de público e participación na novena
edición da ICC Week, que desde o día 17 e ata o domingo desenvolveu
unha ampla e variada programación que deixou na provincia e na
capital “unha forte pegada cultural e creativa”, dixo.
Manuel
Baltar engadiu que "o éxito estaba garantido" grazas a
unha programación que, coordinada por Juan Rivas, ofreceu máis de
vinte propostas en aspectos tan variados como a Intelixencia
Artificial, a ilustración, ciencia, o sector audiovisual, a música,
moda, radio ou os deportes electrónicos. Foron sete días de
actividades que reuniron nunha ducia de localizacións da cidade e da
provincia a preto de trinta relatores, ofreceu ata cinco concertos de
música, dúas estreas audiovisuais e congregou a representantes de
14 países no XIII Congreso Internacional de Asociacións Xacobeas.
Como
dixemos, a Semana das Industrias Culturais e Creativas pechou a
novena edición onte domingo no pavillón do colexio Mestre Vide da
cidade, onde unha ampla representación da mocidade ourensá
participou esta fin de semana na ICC eSports, unha cita cos deportes
electrónicos combinando a competición e maila exhibición con oito
novos talentos de toda España, ademais de torneos abertos a todos os
asistentes e xogo libre en diferentes plataformas.
Con
anterioridade, numeroso público congregouse nos xardíns do Padre
Feijoó da capital para escoitar a música pop, fusión e blues de
Vera Fauna, Amparo Sánchez e The Limboos, capítulo musical no que
tamén destacou a presenza do que fora o líder do conxunto Cadillac,
José María Guzman, e o concerto de Teo Cardalda e Soledad Gimenez
coa estrea incluída do vídeo-clip Agua Soy, que percorre
zonas de provincia vinculadas á auga e o termalismo e que contou na
súa produción coa colaboración da Deputación. No mundo musical
cómpre destacar ademais a presenza en Ourense do presidente de Sony
Music España, José María Barbat, para falar do proceso de
lanzamento de éxitos.
A
ICC Week tamén incluíu un capítulo dedicado á radio, incluíndo a
emisión desde Ourense dun programa de alcance nacional como Más
de uno de Onda Cero, dirixido e presentado por Carlos Alsina.
Tamén ofreceron ao público a súa visión sobre o mundo da radio en
Ourense profesionais da talla de Pepa Fernández, Nora Sola e Moncho
Blanco, ademais dunha edición especial do Foro La Región
para abordar o fenómeno de Rock FM coa participación do xornalista
e produtor Vicente "Mariskal" Romero, acompañado por
directivos da emisora como Jorge Vileilla e Rodrigo Contreras.
A
semana tamén serviu para acoller en Ourense a premier
galega da película Honeymoon, dirixida polo coruñés Enrique
Otero e protagonizada por Nathalie Poza e Javier Gutiérrez.
Ademais,
unha das novidades deste ano na programación da ICC Week estivo no
tratamento da Intelixencia Artificial e as súas aplicacións na
sociedade actual, cunha experta de renome como Gemma Galdón, "e
xunto coa alianza co campus universitario e coa Escola Superior de
Enxeñaría Informática", destacou Manuel Baltar.