A organización do III Foro TIC e Sustentabilidade avoga por respectar o medio ambiente
xoves, 20 de maio do 2010
Ás veces
pensamos tanto en estar ao día e en adquirir os últimos modelos tecnolóxicos da
tenda que esquecemos que o medio ambiente deteriórase un pouco máis cada vez que
nos desfacemos dos nosos portátiles ou dos nosos móbiles tan só porque quedaron
un pouco obsoletos en comparación cos novos, cada vez máis modernos e
sofisticados.
Porén adquirir
tecnoloxía non debería ser unha causa de contaminación senón máis ben todo o
contrario xa que o uso intelixente das TIC contribúe a diminuir as emisións de CO2
no mundo nun 15 por cento.
A clave está en
usar as novas tecnoloxías con cabeza e intentando sacarlle o máximo rendemento
sen deixar de respectar o medio ambiente.
Por exemplo, se
o 20 por cento das viaxes de traballo da UE se substituíran por
videoconferencias, o aforro sería de 22,3 millóns de toneladas de dióxido de
carbono ao ano, unha cifra moi semellante ás emisións de todo o parque de
turismos de España.
Precisamente
para concienciar á sociedade disto, o secretario de Estado de Telecomunicacións
e para a Sociedade da Información, Francisco Ros, vén de inaugurar hoxe mesmo o
III Foro TIC e Sustentabilidade: a
Estratexia de Granada, clave para unha economía sostible, que se celebra
hoxe e mañá en Sevilla para dar conta das medidas a tomar polos Gobernos para
avogar polo respecto ao medio ambiente.
Este encontro,
organizado pola Junta de Andalucía e a Asociación de Empresas de Electrónica,
Tecnoloxías da Información e Telecomunicacións de España (AETIC), busca
identificar as principais oportunidades tanto no sector TIC como nos diferentes
sectores económicos, onde as TIC contribúen ao aforro enerxético.
Na súa
intervención desta mesma mañá, o secretario de Estado sinalou que as TIC
aparecen como tecnoloxías clave para contribuir a unha “economía eco-eficiente baseada na sustentabilidade” e apuntou que supoñen
grandes posibilidades de aforro, de aumento de eficiencia e de mellores prácticas.