A partir desta semana xa poderemos obter en liña certificados de nacemento e matrimonio
martes, 31 de maio do 2011
- O ministro de Xustiza, o galego Francisco Caamaño
Semella que o abano de
cousas que podemos facer a través da Rede vaise ampliando. E cando falamos de “cousas”,
neste caso concreto, falamos de todos eses recados
que nos obrigan a facer cola diante dunha administración, ou ben a
desprazarnos fisicamente até esa administración, pudendo estar facendo outras
cousas (con perdón de quen traballa no eido público) moito máis interesantes.
Segundo informou o Ministerio de Xustiza os días pasados, a partir do 1 de
xuño, os cidadáns que así o desexen poderán solicitar e obter os seus
certificados de nacemento e matrimonio dende o seu computador.
A nova foi avanzada polo
ministro de Xustiza, o galego Francisco Caamaño, quen salientou a gran vantaxe
que este servizo pon en xogo: céibanos de perder tempo en longas fileiras ou
ben facendo números para pedir citas.
Segundo avanzou, o único
que se require é ter un DNI electrónico e un ordenador con acceso á Rede. Dende
aí, teremos que conectarnos á web do
Ministerio, onde se nos darán os pasos a seguir. Estes servizos únense aos
postos en xogo recentemente para a obtención a distancia dos certificados de últimas
vontades, de antecedentes penais e de seguros con cobertura de pasamento. De
todo isto, emitíronse xa 345.000 documentos. Caamaño, ao tempo que deu a
coñecer estas funcionalidades, lembrou que para este desenvolvemento da
Administración Electrónica foi preciso o escaneo de toda a historia civil dos
españois dende 1950. Ou sexa: 120.000 tomos, o que significa a cifra nada
desprezable de 70 millóns de páxinas a dixitalizar.