A primeiros de 2019 teremos dominios .dev

Tras uns anos moi movidos nas creación de novos dominios de primeiro nivel, continúa o goteo, e Google, compañía que xa oferta dominios como o .app ou o .page, anuncia agora que abrirá o rexistro dos dominios .dev a primeiros do ano que vén. Concretamente o 16 de xaneiro abrirá o proceso de sunrise, o 19 de febreiro facilitará un rexistro prioritario (a prezos máis elevados do normal) e, finalmente, o 28 de febreiro abrirá o rexistro xeral, que facilitará o acceso a estes dominios a calquera sen ter que pagar recargas.
Os dominios .dev están claramente orientados a desenvolvedores, como un lugar no que poder amosar os seus proxectos, a súa documentación... e están construídos sobre un precepto de seguridade, sendo obrigado que as páxinas web baixo este sufixo funcionen mediante HTTPS.