A rapazada de 12 a 18 anos xa pode inscribirse nas Aulas Tecnópole
venres, 1 de setembro do 2023
O
Parque Tecnolóxico de Galicia (San Cibrao das Viñas, Ourense) puxo
en marcha unha nova edición das súas Aulas Tecnópole, os cursos de
formación en habilidades científicas e innovadoras para estudantes
de 12 a 18 anos. A matrícula poderá realizarse ata o 30 de
setembro, a través da páxina web Tecnopole.gal.
Esta proposta enmárcase dentro das actividades de Tecnópole
Divulga, que buscan incentivar as vocacións científicas e técnicas
e o espírito emprendedor entre as xeracións futuras.
Aproveitaranse
as instalacións da Aula Newton, polo que as actividades vanse
centrar nos eidos aeronáutico e aeroespacial. “Así, os
participantes poderán deseñar sondas estratósfericas, desenvolver
microsatélites, crear túneles de vento ou deseñar o seu propio
dron”, explican dende a dirección do parque, engadindo que as
Aulas acadan este ano a súa décimo cuarta edición e que as prazas
están limitadas a 45 asistentes, por orde de inscrición. A cota
mensual é de 20 €, que inclúe ademais o transporte desde varios
puntos da cidade de Ourense.
Como
funcionan
A
rapazada trasládase unha tarde por semana a Tecnópole, os
xoves de 17:00 a 19:00 horas, durante os meses de outubro de 2023 a
maio de 2024. Unha vez alí as mozas e mozos dispoñen das
instalacións e recursos do Parque Tecnolóxico de Galicia para levar
a cabo os seus proxectos, axudados por un equipo de formadores con
ampla experiencia docente e de desenvolvemento de programas destas
características.
As e
os participantes nesta experiencia, todas e todos de Secundaria e
Bacharelato, reciben formación sobre as pautas que debe seguir unha
investigación científica rigorosa e a estrutura que debe ter a
memoria escrita na que se recolla o proxecto. Ademais, terán a
ocasión de presentar os seus proxectos en diferentes feiras
científicas de ámbito nacional como Exporecerca Jove en Barcelona
ou Open Science en Cambre.