A sede coruñesa da Fundación Caixa Galicia abre unha mostra con guías persoais de excepción: os nosos móbiles
luns, 8 de xaneiro do 2007 ,
Imaxinemos unha tecnoloxía que por medio de
algo de uso tan común como as ondas de radio permítenos ter comunicacións de
voz e datos entre diferentes aparellos e, por iso (por sobrevoar o ar sobre as
nosas cabezas), ceibarnos definitivamente das enleadas de fíos no fogar ou na
oficina. Nisto consiste máis ou menos a tecnoloxía Bluetooth, un estándar global que non deixa moita marxe para unir
emprazamentos moi afastados (precisaría dun alto consumo de enerxía) entre si
mais que nos pon ó alcance da man unha chea de posibilidades se lle tiramos
rendemento ó enxeño en espazos reducidos. Por exemplo: nun museo.
Neste caso concreto falamos dun espazo ó que lle acae o espírito innovador coma
unha luva: o da Fundación Caixa
Galicia na Coruña, onde se vén de poñer en marcha o que ben podería ser a
primeira iniciativa mundial de emprego dos móbiles dos visitantes como guías
persoais grazas ó Bluetooth.
O sistema, que se presentou este luns 8 pola mañá no devandito espazo coruñés,
foi desenvolvido por unha empresa local que xermolou no viveiro da Universidade
da Coruña: Nomasystems.
Este desenvolvemento, que implica a habilitación de antenas emisoras espalladas
polo edificio, estréase coa mostra A
forza da palabra. Centenario da Real Academia Galega (RAG). Nela, os
visitantes que leven móbiles con Bluetooth
poderán albiscar unha boa parte das posibilidades desta tecnoloxía: o
primeiro elo da cadea virá da man de Xosé Ramón Barreiro Fernández, presidente
da RAG, quen lles dará a benvida á mostra nos dispositivos móbiles. Amais
disto, o percorrido inclúe unha serie de locucións de audio por cada sala e
perante cada obra, “información que se
pode completar con anotacións na axenda de vindeiros actos, datos de contacto
da entidade ou imaxes dalgunhas das pezas expostas”, segundo informa a
Fundación Caixa Galicia.
O funcionamento do sistema é abondo sinxelo e, en contra do que se podería
pensar, non envía información ó chou. É dicir: os datos que nos chegan ó móbil
implican unha localización previa da nosa persoa, polo que poderiamos dicir que
o sistema sabe perante que peza estamos.
Ou sexa, que nos ten localizados, sendo o noso teléfono a baliza da que se axuda.
O proxecto baséase ademais noutras vantaxes: por unha banda, cada vez son máis
os teléfonos no mercado que veñen preparados para sacarlle rendemento ó Bluetooth e, pola outra, xa poucos
quedan onde non se poidan procesar contidos multimedia. Para a Fundación Caixa
Galicia este que vivimos é probablemente o intre preciso para pór en marcha un
proxecto de balde como este, agora que unha boa parte dos cidadáns acoden (por
así dicilo) coa peza que fai que a devandita tecnoloxía funcione, o Bluetooth.
A isto hai que engadir o feito de que os móbiles seguen a venderse no Nadal
como melindres nunha romaría, polo que é de supoñer que estes días moitos
visitantes gozarán poñendo a proba ós seus respectivos agasallos.
Segundo a fundación, o que distingue este sistema en concreto de calquera outro
é o doado do seu emprego e, tamén, a inclusión de contidos de imaxe, texto e
vídeo (até o de agora, en experiencias previas doutros museos só se tirara
rendemento do son, principalmente, engaden os responsables da proposta).