A segunda edición da Geocamp chega a Coruña
mércores, 4 de xuño do 2014
Intercambiar
experiencias, coñecementos e valores arredor das tecnoloxías da
información xeográfica (XEO) e facelo nun formato de
“desconferenza” (sen programa previo) podería ser un resumo do
que será a segunda edición da versión estatal da Geocamp.
O evento
en cuestión celebrarase o vindeiro 21 de xuño nun centro social de
intervención artística, situado nun antigo almacén da estación de
tren de A Coruña, A
Casa Tomada. Cómpre dicir que a Geocamp ES está organizada pola
agrupación Xeoinquedos e a
asociación GHANDALF.
E en que consiste unha
Geocamp? Ten a súa orixe no concepto de Barcamp e trátase dunha
xeo-desconferenza, un encontro onde todos os participantes toman un
papel máis activo dentro da creación do propio evento.
Na
edición
do ano 2013 máis de 50 persoas xuntáronse na localidade de
Bouzas (Vigo), chegados de varios puntos de España e mesmo dende
Estado Unidos, procedentes de entidades públicas, empresas punteiras
no sector XEO a nivel mundial, administracións, freelances...
Na
edición deste ano contarase de novo coa participación de empresas e
organizacións do eido local, nacional e internacional, con gran
importancia dentro do panorama XEO, o que permitirá aos asistentes,
poder aprender, coñecer e compartir iniciativas arredor do mundo da
información xeográfica. Estarán presentes: CartoDB, empresa
punteira na visualización de datos xeográficos con sedes en Madrid,
Nova York e Berlín. Glob3 Mobile, empresa a cabalo entre Cáceres e
Washington, especializada na visualización 3D. Algún membro do
Board da Fundación OSGeo, OSGeo Portugal e ESRI España, quen virá
falar do seu achegamento ao software libre.
Para máis información
sobre o evento pódese visitar o seu blogue.
No caso de querer participar só será preciso rexistrarse nesta
ligazón.
Engadir, por último, que esta
actividade forma parte das actividades que Ghandalf realiza ao abeiro
do convenio de colaboración asinado coa Axencia para a Modernización
Tecnolóxica de Galicia (AMTEGA),
e incluídas no Plan
de Acción de Software Libre 2014 da Xunta de Galicia.