A sextorsión dispararase nos anos vindeiros de non aplicarmos máis medidas de precaución
venres, 5 de setembro do 2014
Entre os males que se
derivan dun mal uso das novas tecnoloxías da información (que non
simplemente de usalas) está unha práctica que se denomina sexting,
da que falamos estes días porque figura entre as costumes dunha
parte (polo de agora miúda, arredor do 4%, pero todo indica que se
vai incrementar) dos internautas novos da nosa terra. Así
se certifica no informe Mocidade en liña. O sexting,
para entendernos, consiste en enviar (voluntariamente ou non) fotos
ou vídeos de contido erótico ou sexual por medio de Internet. As
implicacións destas prácticas poden ser de longo alcance se o envío
é voluntario, pero dispáranse se no sexting media roubo de
información. Estes días nos que se fala tanto desta costume en liña
(coas
fotos íntimas da famosas pasando dun lado a outro da Rede),
Kaspersky Lab vén
de amosar unha serie de consellos para evitar as súas consecuencias.
Para comezar, a compañía
de seguridade informática lembra que calquera pode converterse en
vítima dun roubo de información, fotos ou vídeos. “Un claro
exemplo”, di, “é o acontecido esta semana con fotos
comprometidas de famosas, almacenadas en iCloud, que saíron á luz”.
Para a empresa, un dos grandes males da Internet actual, ou do seu
mal uso, é sen dúbida a chantaxe sexual, coñecida como sextorsión,
unha práctica na que alguén, un cibercriminal, conta con contido
privado doutros individuos (normalmente fotos ou vídeos) e ameázaos
con facelo público en Internet, a menos que as vítimas paguen con
algún favor, en ocasións de índole sexual. Noutras palabras, o
criminal esixe máis fotos ou vídeos, ou que a vítima realice un
pago, baixo a ameaza de publicar e difundir devanditos contidos se
non o fai. Isto realízase de diferentes xeitos, ben instalando
programas espía no computador ou no dispositivo móbil da vítima,
ou controlando a súa cámara web, ou tamén levando a cabo tácticas
de suplantación de identidade (en liña), o chamado phishing,
descargando programas que son quen de roubar contidos directamente
dun computador alleo. A sextorsión tamén se pode
materializar roubando computadores ou trebellos móbiles.
Isto reforza a teoría de
Kaspersky de que “calquera pode converterse en obxecto dun roubo,
aínda que non todos gardemos nos dispositivos esta clase de fotos ou
vídeos”. A firma conclúe cunha serie de medidas a pór en
práctica para protexermos documentos e minimizar riscos, medidas que
deberán ir alén de facer copias de seguridade. Ou sexa, que cómpre
que o usuario poña “algo da súa parte”. O primeiro e máis
importante: non debemos almacenar nunca nos nosos dispositivos
información que poida prexudicarnos. De tela, débese protexer cun
contrasinal. Tamén convén evitar que calquera persoa instale un
malware ou un spyware
no noso computador. Para acadalo, non se debe acceder a ligazóns
sospeitosas dende as que nos envíen correos electrónicos, cómpre
que teñamos coidado coas web que visitamos e asegurarnos de que o
noso sistema operativo e todos os seus programas están
actualizados. Ademais, hai que vixiar o computador cando estamos en
lugares públicos e non conectar dispositivos descoñecidos aos nosos
equipos ou móbiles. Outro consello a ter en conta, fundamental, é
ter posto un antivirus eficaz no móbil ou no computador.