A tenda en liña Metrópolis Cómics doará unha parte das súas vendas ás ONG
martes, 8 de novembro do 2011
A tenda en liña de banda deseñada Metrópolis Cómics, con base na rúa
María de Ferrol, vén de pór en marcha unha actividade de apoio á acción social
para celebrar o Día das Librarías, este 25 de novembro que xa se albisca ao
lonxe. A iniciativa, chamada O cómic
solidario, diríxese a axudar, mediante a lectura de banda deseñada, a xente
que o precisa (cada vez máis neste contexto de crise produtiva). Segundo
informan fontes da tenda en liña, o tema consiste na elección, cada corenta días,
dun título do catálogo do establecemento para dedicar tódolos beneficios de
venda do cómic en cuestión a unha organización sen arela de lucro.
“As
compras en liña deste cómic solidario só se poderán facer, precisamente, a través
da nosa web”, engaden dende Metrópolis Cómics, aínda que puntualizan: “Os clientes da nosa comarca e os que decote
visitan o noso establecemento poderán escoller a opción de recollida en tenda”.
A iniciativa xa dá comezo este mes de novembro coa obra Todo barrio, de Carlos Giménez, sendo a ONG elixida para achegarlle
os beneficios Médicos sen Fronteiras.