A web Cóntame Ferrol colle impulso cun obradoiro para xerar novos contidos sobre a cidade
venres, 3 de setembro do 2021
O
proxecto web
Cóntame Ferrol, encamiñado a promover e reivindicar a cidade dende
os contidos da cidadanía e o tecido asociativo, xa ten aberto o
prazo de inscrición do seu obradoiro de participación. A idea á
preparar o camiño para que as entidades e a veciñanza poidan
compartir neste acubillo en liña, contame.ferrol.gal,
as súas iniciativas culturais e dinamizadoras. A web abre ao público
este mes de decembro. O taller dispón de 20 prazas e desenvolverase
entre o 17 de setembro e o 5 de novembro, tendo carácter
semipresencial e unha orientación práctica. Os interesados poden
anotarse ata o 13 de setembro na web de Cóntame Ferrol.
Cóntame
Ferrol é unha iniciativa posta en marcha polo Concello de Ferrol a
través da concellería de Cultura, que dirixe Antonio Golpe. Trátase
dunha proposta para recompilar, preservar e difundir contidos creados
arredor do territorio e a súa xente cun dobre obxectivo: ofrecer ás
iniciativas xa existentes un espazo común de contacto co público e,
ao mesmo tempo, facilitar que calquera persoa poida acceder a elas
dun xeito práctico e sinxelo.
Co
fin de “contribuír á creación dun relato propio e impulsado
dende a cidadanía”, Cóntame Ferrol recompilará contidos de
carácter amador ou profesional, cuxo tema (patrimonio, saberes,
toponimia, artes, memoria…) teña relación coa contorna e a
veciñanza, “prestando unha especial atención a aqueles que
respondan a un perfil sociocultural, creativo ou divulgativo”.
O
proxecto abre a súa primeira fase convidando a participar a persoas
e entidades, que atoparán na web do mesmo a información necesaria
para compartir as súas propostas. Estas, segundo explicou o
Concello, poderán ser espazos web, plataformas audiovisuais, novas
narrativas, arquivos sonoros, en vídeo ou fotográficos, así como
obras escritas ou proxectos expositivos, entre outros formatos.
Os
contidos e detalles do obradoiro
Ademais
de apostar polos contidos que xa existen, o Concello quere dotar á
cidadanía de ferramentas e estratexias útiles para avanzar en novas
propostas de perfil dixital. Para iso, a área de Cultura convocou un
obradoiro de creación audiovisual e mapeo dixital para o presente
mes de setembro.
O
taller, que dispón de 20 prazas, desenvolverase entre o 17 de
setembro e o 5 de novembro, terá carácter semipresencial e unha
orientación práctica. As 40 horas de dedicación total estimadas
distribuiranse entre sesións presenciais, en liña e traballo
persoal. A inscrición estará aberta ata o vindeiro 13 de setembro
ou ata pechar a capacidade do obradoiro.
Segundo
informa a área de Cultura, “este novo percorrido formativo está
dirixido a calquera persoa creativa, especialmente aquelas que teñan
relación coa arte, o asociacionismo e os ámbitos educativo e
sociocultural, e ofrecerá a posibilidade de aprender a realizar
pequenas pezas de vídeo e situalas nun mapa dixital, xerando un
percorrido polo territorio en base a tres posíbeis temas: a memoria
industrial, a memoria veciñal e a memoria dos lugares”.
O
froito final será un mapa aberto ao público que poderá visitarse
na web de Cóntame Ferrol antes de que remate o ano, xunto cos demais
contidos e experiencias recompiladas no marco do proxecto.