ADICAE axúdanos cunha xornada a practicar un comercio electrónico seguro e fiábel
mércores, 4 de maio do 2022
ADICAE
(a Asociación para a Defensa de Consumidores e Usuarios de Bancos,
Caixas e Seguros) organiza esta semana na Coruña e en Vigo (e por
vídeo-conferencia) unha actividade divulgativa encadrada no seu
traballo por facilitar na sociedade “unha transición dixital
xusta”. A xornada O comercio electrónico e os consumidores
celebrarase este venres 6 de maio en horario de 10.00 a 11.00 horas.
Desenvolverase en
colaboración co Centro Gaiástech, encargado de apoiar a
transformación dixital en Galicia. O obxectivo da cita é achegar
aos cidadáns recursos de toda índole para protexer os seus dereitos
e datos no uso do comercio electrónico. As persoas interesadas poden
formalizar a súa inscrición a
través da ligazón habilitada. Poderán participar mediante
vídeo-conferencia ou acudindo ás sedes de ADICAE na Coruña e en
Vigo.
Máis en concreto,
achegaranse recomendacións e aspectos a ter en conta antes, durante
e despois de realizar unha compra por Internet, incluíndo os
dereitos que amparan aos consumidores, as obrigas do vendedor de cara
aos seus clientes e os puntos clave para comprar de forma segura e
evitar estafas.