AMTEGA e FEGAUS poñen o foco en formar ás persoas maiores en tecnoloxías e banca en liña
xoves, 10 de marzo do 2022
A
Federación Galega de Asociacións Universitarias Séniors (FEGAUS),
en colaboración coa Axencia para a Modernización Tecnolóxica de
Galicia (AMTEGA), iniciou un novo programa formativo que inclúe 50
charlas orientadas a fomentar o uso da tecnoloxía e a banca online.
Os seminarios están especialmente orientados ás persoas maiores, co
obxectivos de incrementar os recursos que posúen para desenvolverse
nun mundo cada vez máis conectado, aínda que, segundo sinalan as
ditas entidades, a inscrición está aberta para todas as persoas
interesadas en ampliar os seus coñecementos nestes ámbitos.
A
Rede CeMIT, tecido de espazos de capacitación dixital espalladas
polo noso territorio, colaborará a través de emisións online
e presenciais nas aulas CeMIT. Neste momento son 14 as localidades
que se suman a esta iniciativa: Abegondo, Arzúa, Beariz, Boiro,
Carballedo, Castrelo de Miño, Celanova, Cuntis, Fisterra, Ribadeo,
Ortigueira, Ponteareas, Santa Comba e Valga.
Segundo
informou AMTEGA, as persoas interesadas en participar contarán co
asesoramento dos dinamizadores/as dos centros durante o proceso de
alta e conexión ás charlas, no caso de que desexen seguir estas
sesións desde os seus fogares en formato en liña.
Para
a formalización das inscricións para participar de xeito presencial
recoméndase establecer contacto cos responsábeis das aulas CeMIT
participantes en cada seminario ou na
web da Rede CeMIT. O único requisito é ser ou darse de alta
como usuario/a da Rede ou, no caso de seguir os cursos desde a casa,
inscribirse desde a
web de FEGAUS en Canal Sénior.
A
federación e a axencia poñen o foco na accesibilidade da formación:
serán contidos formativos presentados de “xeito ameno e sinxelo”
e están orientados a que os asistentes poidan sacar o máximo
partido a través de sesións gratuítas de 60 minutos de duración,
en horario de mañá e tarde, de 10.30 a 11:30 horas, e de 17.00 a
18:00 horas, e versarán sobre temáticas moi diversas como:
•
Consumo Sénior: Como evitar o spam telefónico; Nova
tarifa da luz, coñécea e aforra na túa factura!, Dereitos
do consumidor nos produtos e servizos dixitais, etc.
•
Soidade: A importancia de falar en positivo, Consellos
útiles para xestionar os teus medos, Vivir o duelo como un
proceso natural, etc.
•
Dinamízate: Atrévete con
Facebook, Atopa a túa app de relaxación ideal e practica
cada día; Si o Sabes! Descubre os xogos de preguntas
máis interesantes para o teu móbil, etc.
•
Rural TIC: Que é a
Administración electrónica, Trámites online sen certificado
electrónico, Novidades do DNI electrónico (4.0), etc.
•
Relaciona TIC: Outras formas de ler, apps de relatos en chat e
audiolibros; App para vender aquilo que xa non
usas; Conecta os teus dispositivos: altofalantes intelixentes,
reloxos, enchufes, etc.
•
Banca Dixital: Séniors TIC: Aprende a usar un caixeiro
automático, Pagos seguros por internet, Como acceder á
túa conta bancaria; Tarxetas prepago: recarga cando queiras e
paga con tranquilidade, etc.
Quen
queira consultar polo miúdo os bloques, as datas e os lugares de
celebración das actividades ten
toda a información na web da Xunta e de AMTEGA.