Aberto o prazo de solicitude de axudas para desenvolver proxectos TIC innovadores
martes, 19 de xuño do 2012
A subdirectora
xeral de Fomento da Sociedade da Información do Ministerio, Mª Ángeles
Zorrilla, maila directora da área de Sociedade Dixital da AMTEGA, Yolanda García,
participaron esta mesma mañá nunha xuntanza cos principais axentes e empresarios
de varios sectores produtivos do país, entre eles o tecnolóxico, para informalos
de que xa está aberto o prazo de solicitude de axudas que concede o Ministerio
de Industria para o desenvolvemento de proxectos tecnolóxicos innovadores, así
como dos requirimentos que se esixen para optar ás subvencións.
Segundo
explicaron, “a contía total das axudas
ascende a 533,5 millóns de euros para 2012”(48 millóns a entregar
directamente como subvencións e 485,5 en forma de préstamos) que se dirixirán
tanto a empresas do sector tecnolóxico como doutros sectores produtivos que
desenvolvan proxectos innovadores baseados nas TIC.
As iniciativas presentadas “deben achegar solucións innovadoras próximas ao mercado en catro liñas
de actuación”, explicaron, que son a competitividade da PEME; a administración
electrónica; os sistemas de compartición de contidos e mobilidade; e os sistemas
de seguridade e confianza para o usuario, coa incorporación das tecnoloxías
axeitadas e prioritarias, como o cloud computing, entre outras.
A titular de
Fomento indicou que esta convocatoria, cuxo prazo está aberto ata o vindeiro 5
de xullo, “priorizará a concesión da
axudas a aqueles proxectos que estean preto do mercado e incrementen a
competitividade da industria TIC española”, debido, sobre todo, ás
esixencias de optar pola máxima eficiencia posible no uso dos recursos públicos.
Coa fin de facilitar o acceso ao
financiamento, o pagamento das axudas, nas súas dúas modalidades de subvención
e préstamo, “efectuarase con carácter
anticipado e polo importe total da axuda”, informaron, “con independencia do carácter anual ou
plurianual da execución do proxecto”. O devandito pagamento indicaron que
estaría condicionado á presentación de garantías polo 35% do importe dos
préstamos que se concedan.
Por outra banda, as axudas en
forma de subvención serán, polo menos, do 9,5% do presuposto; e as realizadas
baixo a modalidade de préstamo outorgaranse a un tipo de xuro do 3,95%, cun prazo
de amortización de sete anos, incluído tres de carencia.