Abre as súas portas o Campamento Kamikaze de Carballo
luns, 1 de abril do 2019
A sexta edición do
Carballo Interplay, o
festival de webseries e contidos dixitais de Carballo, comeza
finalmente a súa semana máis grande. Hoxe, a xeito de inauguración
semi-oficial, abre as súas portas (até o mércores) unha das
súas vertentes máis intensamente creativas: o Campamento
Kamikaze. Trátase dunha actividade de confraternidade e creación
colaborativa que ten a súa sede nun senlleiro espazo de encontro, a
praia carballesa de Razo (no Raz Surf Camp).
Alí, durante tres
días, os participantes enfrontaranse ao desafío de concibir, gravar
e postproducir un pequeno vídeo (un Dinosauro) de menos de 10
minutos a partir da premisa argumental da fin definitiva de Internet,
unha desaparición da que, para darlle máis intriga ao desafío e
estimular o tanto das creadoras e creadores, descoñécense as
razóns.
Segundo informa a
organización (o selo Interplay Producións capitaneado por Sonia
Díaz e máis o Concello de Carballo), o resultado proxectarase o
mércores 3, ás 20.30 horas, no auditorio do Pazo de Cultura de
Carballo, a xeito de apertura (desta volta oficial) do certame. Logo,
o xurado oficial do Carballo Interplay deberá escoller entre estas
contribucións e as que envíe o público a obra gañadora do Premio
ao Mellor Dinosauro, que vén cunha dotación de 400 euros.
Está previsto que no
campamento creativo de Razo participen dúas ducias de persoas, entre
actrices e actores, cámaras, guionistas, responsábeis de
produtoras, músicos e estudantes, todas e todos compartindo a arela
de “asumir o reto de crear e contar historias” e “aprender
desfrutando man a man con profesionais do sector”. Na súa
experiencia estarán acompañados de directoras e directores como
Andrés Goteira (Dhogs), Sandra Sánchez (A nena azul)
ou Dani Viqueira (Limbo). Tamén participarán, achegando a
súa bagaxe e coñecemento, profesionais do do sector como Lucía
Estévez (que traballa en diferentes proxectos nos departamentos de
cámara e dirección e que o ano pasado se fixo co premio María Luz
Morales a Mellor Videoensaio sobre Audiovisual Galego pola súa peza
Muller Personaxe), Suso López
(produtor e actor en Dhogs), Natia Juncal (produtora da
serie dixital Antes de Perder para Playz de RTVE) ou Daniel
García (guionista, coordinador de guión e profesor de narrativa
audiovisual).
O certame en si
mesmo
A sexta edición do
Carballo Interplay ofrecerá esta semana no Pazo de Cultura da vila
“unha panorámica da innovación na rede a nivel galego, español e
internacional”, en palabras da organización, que tamén destaca a
súa sección oficial (con webseries de todo o mundo) e o
completo programa de actividades que acompaña o certame (con
encontros, obradoiros, relatorios e espectáculos nos que aprender e
divertirse arredor dos contidos para Internet). Como vén sendo
habitual, todas as actividades do Carballo Interplay son de acceso
libre e de balde ata completar aforo, menos a formación e a
programación profesional, para as que hai que inscribirse
previamente.