Ames acolleu o quinto encontro de coordinación da rede de centros de coworking da Deputación da Coruña
venres, 20 de outubro do 2023
O
espazo colaborativo A
Proa, situado no parque empresarial do Milladoiro (Ames), acolleu a
quinta edición do Encontro de Coordinación da Rede Provincial de
Espazos de Coworking da Deputación da Coruña. A apertura
institucional estivo presidida polo alcalde de Ames, Blas García, a
deputada de Industria, Emprego, Política Demográfica e Medio
Ambiente, Rosa Ana García López, e a concelleira de Promoción
Económica do Concello de Ames, Ana Belén Paz. Durante o encontro
realizouse a presentación do Ames AV Lab e unha visita guiada polo
espazo A Proa, o centro local de coworking situado en
Milladoiro. Realizouse unha mesa redonda na que se expuxo a situación
de cada un dos espazos de traballo por parte dos responsábeis da súa
xestión. Tamén houbo unha presentación de novidades, espazo para o
debate, aclaración de dúbidas e propostas en común.
Blas
García destacou no acto “o forte compromiso que ten o Concello de
Ames coa formación e coa inserción laboral, tal e como demostra cos
numerosos programas de formación que leva a cabo en solitario e en
colaboración con distintas administracións e na elevada taxa de
inserción laboral”. Tamén agradeceu á Deputación da Coruña a á
deputada a súa presenza na Proa, “un espazo que pretende
consolidarse como unha referencia na aceleración de proxectos
audiovisuais, un potente sector en Galicia no que Ames ten moito que
dicir”.
A
continuación a deputada Emprego, Rosa Ana García López, destacou
“o gran número de proxectos existentes, cos que na Deputación da
Coruña estamos plenamente implicados, pois levamos traballando
moitos anos neste sentido”. García López explicou que con estes
centros de traballo, “a Deputación persegue obxectivos como reter
o talento da nosa xente nova e fixar poboación no rural, creando
novas oportunidades laborais para elas e eles”.
Segundo
engadiu, nestes espazos de traballo colaborativo, a xente pode
compartir experiencias, xerar sinerxías e axudarse a solucionar
problemas. Esta rede leva activa 5 anos e conta con 11 centros, cada
un especializado nun sector estratéxico, sendo o audiovisual o caso
da Proa, engadiu.
Posteriormente,
a técnica municipal de inserción laboral, María Lloves, fixo unha
presentación sobre o Ames AV LAB que se está en fase de licitación.
O Concello de Ames, co apoio da Deputación da Coruña, está a poñer
en marcha o proxecto Ames AV LAB, que se concibe como “un
laboratorio de aceleración de proxectos audiovisuais, que busca
impulsar a produción, o fomento do talento emerxente e a
dinamización do importante tecido produtivo da provincia”.
A
deputada, Rosa Ana García, destacou a aposta da Deputación polo
sector audiovisual, con proxectos como o maior plató virtual de
España que estará emprazado na Cidade das TiC da Coruña e
interesouse polo Ames AV-LAB, un laboratorio que pretende apuntalar o
polo de talento do audiovisual galego, “contribuíndo a definir a
seguinte xeración de líderes do sector español con vocación
internacional e innovadora”.
Por
outra banda, realizouse unha visita guiada polo espazo colaborativo A
Proa, que conta con 36 postos, dos cales na actualidade hai 18
ocupados con 12 proxectos diferentes sobre mercadotecnia dixital,
produción audiovisual, educación, arquitectura, economía circular,
comercio internacional, medio ambiente, etc. As empresas instaladas
na actualidade son 12: Impulsa Dixital, Indígena Films, Palabra
Xeneradora, Marxe e Territorios Latentes, Aquelando SL, Angel
Marcelino Costa, Hub of English, Serea Film, Temporit, Leiloio
Internacional, Eco-Huella, Andrea Ferreti Moncau.