Aplex Factory lanza a web Pictocontos para axudar aos nenos autistas a relacionarse coa súa contorna
mércores, 3 de abril do 2013
Coincidindo co Día
Mundial de Concienciación sobre o Autismo (onte martes),
chegounos á redacción de Código Cero un novo e interesante achado
en materia de tecnoloxía ao servizo das persoas que sofren o
devandito trastorno. O achado en cuestión, de autoría galega,
chámase Pictocontos, e
ten o punto de partida nun potencial que vén de moito antigo: o
potencial dos relatos narrados para atraer a atención e a
interacción dos cativos. Desta volta, isto faise empregando
pictogramas ao servizo dunha mellor comprensión da contorna dos
nenos usuarios, botando man de historias clásicas, de abondo
coñecidas, e buscando estimular o maxín dos rapaces e máis a súa
capacidade de linguaxe.
A finalidade destes
relatos con pictogramas, contan os seus responsábeis, é permitir
variadas opcións á hora de adaptarse ás necesidades de cada
usuario; por tanto, amplíase o seu radio alcance (de feito, agárdase
que poidan ser de utilidade para moitos nenos con dificultades de
expresión oral). Amais do devandito, cómpre sinalar que se trata
dunha aplicación de balde inserida dentro dun acubillo máis amplo
(pictoaplicaciones.com)
de ferramentas creadas para mellorar a comunicación das persoas con
dificultades para expresarse. Estes e outros recursos veñen da man
de Aplex Factory, a división para o desenvolvemento de aplicacións
propias do Grupo Promedia SMPE, con sede de seu en Milladoiro (Ames).
“Os nosos pictocontos”, din, “teñen
como particularidade que os pictogramas poden ser modificados nas
opcións do conto, para amosalos a un maior tamaño e
gañar en visibilidade, situar o texto con respecto ao pictograma
para afacerse ao uso habitual do neno, elixir se se
desexa ver en maiúsculas ou minúsculas incluíndo as
palabras escritas que van no interior dos pictogramas, pór o bordo
dos pictogramas en cor para diferenciar as categorías de palabras,
elixir entre 6 tipos de fontes diferentes, dar a posibilidade de
mostrar ou ocultar a frase que vai sobre a pantalla de animación,
etc”. O primeiro conto desenvolvido é Riziños
de Ouro e os tres osos, que conta con atractivas ilustracións
animadas. Tamén se deseñou para iPad e Android, co fin de que
“poida ser empregado a través dos seus respectivos
navegadores”.