Arranca Inspira STEAM, o programa para espertar vocacións científicas entre o alumnado no que colabora o CITIC
mércores, 18 de xaneiro do 2023
Este
xoves 19 de xaneiro vai comezar unha nova edición do programa
Inspira STEAM, promovido pola Universidade de Deusto e coordinado
na Coruña pola investigadora do Centro de Investigación en
Tecnoloxías da Información e as Comunicacións (CITIC) da
Universidade da Coruña Verónica Bolón. O programa, segundo
informou o CITIC, ten a finalidade de “fomentar as vocacións
científico-tecnolóxicas entre estudantes, especialmente entre as
nenas”.
A
nova edición dá comezo este 19 de xaneiro cunha xornada formativa
en liña de cinco horas de duración destinadas a mentoras e mentores
do ámbito académico, empresarial e da investigación. A formación
será impartida por Ander Mimenza Aurrecoechea, formador e consultor
especializado en desenvolvemento organizacional e de persoas.
O
CITIC explica que unha vez realizada a xornada formativa
desenvolveranse seis sesións de traballo en centros educativos de
ensino primario da provincia da Coruña cos obxectivos de “facilitar
ao alumnado referentes de mulleres científicas e tecnólogas, dar a
coñecer as profesións STEAM, sensibilizar e orientar sobre os
estudos en ciencia e tecnoloxía, reivindicar as mulleres STEAM da
historia, así como dar a coñecer os estereotipos existentes nestas
áreas para que non condicionen as decisións de nenas e nenos”.
Esta
edición do programa tamén contará coa colaboración da cátedra
NTT Data e o Colexio Profesional de Enxeñaría Informática de
Galicia (CPEIG).
Formación en Ciencias, Tecnoloxía, Enxeñaría, Arte e Matemáticas con enfoque práctico
- A investigadora do CITIC Verónica Bolón
Dada
a súa utilidade na vida cotiá, espertar o interese entre os máis
novos polas profesións STEAM (das siglas en inglés de Ciencias,
Tecnoloxía, Enxeñaría, Arte e Matemáticas) é un dos obxectivos
estratéxicos do CITIC da UDC. Programas de estudos, sesións
informativo-formativas e sinerxías con iniciativas desta índole son
parte esencial do seu plan de acción.
Nesta
ocasión, a investigadora do Centro Verónica Bolón, especialista en
Intelixencia Artificial, colabora co programa que levará a diversos
centros de ensino primario da provincia da Coruña as claves das
disciplinas STEAM. Facelas interesantes, atractivas e achegar a súas
múltiples aplicacións no desenvolvemento de diversos traballos na
vida cotiá é unha das finalidades desta iniciativa. Transmitir un
coñecemento transversal dos contidos e buscar un enfoque práctico
seguindo o pensamento científico é tamén fundamental, segundo
confirmou o CITIC, engadindo que o programa “busca, en definitiva,
asentar as materias STEAM como eixo educativo en termos de igualdade
de xénero e, ademais, salvar a barreira de asociar estas materias
cunha maior dificultade con respecto ás de humanidades”.