Arredor de medio cento de voluntarios participan hoxe en Láncara na xornada Eu amo fedellar
venres, 23 de outubro do 2015
Da man da Rede ReVOLTA
e case media ducia de asociacións e colectivos da nosa terra a prol
do coñecemento libre, organízase hoxe en Láncara, Lugo, unha das
actividades máis interesantes da tempada en materia de tecnoloxía
sen cancelas: non só polo que significan para os nosos días os
ámbitos nos que se insire a actividade (tecnoloxía aberta e o
desenvolvemento participativo) senón polo que implica o cometido
concreto da cita: crear de xeito colectivo maquinaria con software
aberto especialmente dirixida a facilitar as actividades
agrogandeiras. Na xornada, convocada baixo o epígrafe Eu
amo fedellar, tamén participan o colectivo Montenoso,
Enxeñería
sen Fronteiras, Makers
de Lugo, a Asociación
Galega de Amigos de Maquinaría Agrícola Clásica e o Colexio
Alcalde Xosé Pichel de Coristanco. A cita é no Museo Integrado de Maquinaría Agrícola Clásica de Trasliste. O obxectivo: crear comunidade de desenvolvedores/as de
maquinaría agrícola en código aberto. Na xornada achegarán
cadanseu gran de area case medio cento de voluntarios.
A actividade insírese dentro do movemento das
economías en código aberto e, en palabras dos organizadores, “parte
da capacidade propia dos galegos e galegas, que historicamente veñen
acreditando un gran potencial de autosuficiencia”, e máis do
proxecto Open
Source Ecology, unha comunidade que traballa no desenvolvemento
de maquinaría agrícola en código aberto.
Un relatorio sobre a innovación tecnolóxica ao
longo da historia, a cargo do catedrático da USC Lourenzo Fernández
Prieto, abrirá ás 11.00 horas o programa Eu amo fedellar no
marco do que Pablo Blanco, de Montenosp, relatará a súa experiencia
no deseño e manufactura dun produto. Tucho Méndez, do CPI Alcalde
Xosé Pichel de Coristanco; Jesús Toural, de Makers Lugo; Marcos
Vázquez, da Asociación Galega de Amigos da Maquinaria Agrícola
Clásica, e un membro de Enxeñaría sen Fronteiras completan a
relación de relatores que intervirán no programa de Eu amo
fedellar, que se desenvolverá en quenda de mañá.
A filosofía Open Source
Segundo apuntan as asociacións organizadoras do
evento, o movemento arredor do código aberto (movemento Open
Source) ten aberto “un amplo abano de posibilidades de
desenvolvemento de programas, aparellos e tecnoloxías diversas por
parte de colectivos diversos, tanto nos ámbitos do hardware libre e
o software libre como tamén no ámbito da maquinaría agrícola en
aberto”. Se por algo se caracterizan estas comunidades é por
traballar en equipo e fomentar a apertura do código e a posibilidade
de remestura e uso por parte da cidadanía interesada, “facilitando
que todo aquel que teña inclinación por estas cuestións poida
fedellar e forzar no seu aparello e artellar por si mesmo a súa
propia maquinaria”, sinalan dende as ditas asociacións galegas,
que engaden que a proposta de Eu Amo Fedellar insírese (tamén
e por dereito propio) no movemento das economías en código aberto.
Polo tanto, din, a proposta parte de dúas fontes principais. A
primeira é a capacidade propia das galegas e galegas que
historicamente veñen acreditando un amplo potencial de
autosuficiencia. A segunda son os alicerces do proxecto Open
Source Ecology, unha comunidade que leva
traballando tempo no desenvolvemento de maquinaría agrícola en
código aberto.
Volvendo á cita de hoxe servirá polo tanto para
pensar o que facer con todas as habilidades e coñecementos que
achega cada integrante e cada experiencia paralela previa. Será, en
palabras dos organizadores, “unha mostra de diferentes accións
relacionadas coa maquinaría agrícola en código aberto, a evolución
da innovación tecnolóxica ou a necesidade de impulsar a robótica
no medio rural”.