As Crebas de Miro Villar, mellor blog galego do ano
luns, 7 de maio do 2012
As Crebas, de
Miro Villar, foi escollida pola Asociación de Escritores/as en Lingua Galega (AELG) como a mellor bitácora literaria do ano. O
caderno en liña, dende se nos ten puntualmente informados de novidades
editoriais galegas e (tamén) do que se lanza ao mercado das letras dende a
outra beira do Miño e outras terras irmás, compartiu recta final no certame da
AELG con Caderno da crítica (de Ramón Nicolás),
e Criticalia (de Armando
Requeixo), a quen Miro Villar, na entrega destes premios, felicitou polo
seu importante labor informativo amais de “recomendalos
vivamente”.
Coa posta en marcha de As Crebas, caderno nado o pasado 28 de xuño (o mesmo día no que
desapareceu dos quioscos Galicia Hoxe, segundo engadiu Villar), o autor quixo pór
o seu gran de area no proceso de recuperación dos medios en galego, un proceso
que dun tempo a esta parte estableceu certo cariz positivo, co xurdimento de Dioivo, Praza
Pública e Sermos Galiza, apuntou Villar na
súa intervención.
Xa nun plano non dixital e segundo se conta (precisamente)
dende Praza
Pública, a Cea das Letras da AELG, unha vez máis o marco elixido para a
achega oficial dos galardóns, saldouse co importantes premios a Agustín
Fernández Paz, Pilar Pallarés ou Antón Riveiro Coello nas categorías de
literatura infantil e xuvenil, poesía e narrativa. O galardón á mellor
obra dramática recaeu en Raúl Dans por Chegamos
despois a unha terra gris. Asemade, recoñeceuse o labor dos equipos de
normalización lingüística dos centros de ensino, así como os servizos dos
concellos por contribuíren á difusión literaria. Amais disto, José Luís
Sampedro foi galardoado como Escritor Galego Universal.