As declaracións da concursante galega de GH en contra da nosa lingua anoxan á comunidade internauta
martes, 15 de febreiro do 2011
O primeiro que un xornalista calquera soe facer un luns, 14 de febreiro, ao
chegar á redacción e abrir a súa conta de correo electrónico, son mensaxes
relacionadas con San Valentín (as máis delas con feitura de correos non
desexados que se apuran a borrar antes de que poidan estragar unha mañá de luns
xa de por si difícil de levar). Porén, para sorpresa de moitos (e non grata) a
mañá de onte foi unha mañá distinta, onde as entradas sobre o día dos namorados
eran eclipsadas polo vídeo
dunha concursante galega do Gran Hermano que
esbardallaba sen reparo contra os galegofalantes, cualificándoos, entre outras
lindezas, de “paletos”, “brutos” ou mesmo “ignorantes” (referíndose con este adxectivo ás persoas que teñen
gheada e seseo na súa fala).
Marta, como se coñece a esta personaxe do reality de Tele 5, cóntalle á súa compañeira que a xente moza non
adoita falar galego, agás os nacionalistas, que, malia “saber” falar castelán, “deciden
falar en galego”.
A moza coruñesa non queda aí e incluso chega a asegurar que nunha ocasión
lle presentaran a un mozo guapo pero en canto viu que falaba galego lle dera un
“bajón”.
Como era visto, as reaccións en Internet non se fixeron agardar e os
usuarios galegos de Facebook apuraron a crear eventos e grupos nos que se
evidencia o malestar xerado na comunidade galega por mor das desatinadas
declaracións da moza.
Grupos como Marta López
(Gran Hermano) fóra de Galicia! Petarda; Eu tamén creo que os pais de Marta de Gran hermano eran irmáns; Marta
López fóra de gran hermano por insultar a nosa lingua!!!; Plataforma pro
expulsión de Marta, la gallega de Gran Hermano… son só unha pequena mostra
de todo o que se está a cocer nas redes sociais, á que hai que engadir un
evento creado para desprestixiar á concursante galega, que terá lugar o
vindeiro luns, 28 de febreiro na Rede, e que leva por nome
Todos
os galeg@s contra Marta de GH. Por RIRSE DA NOSA LINGUA!!!.
Se é que ó final,
o que menos importa é se se fala ben ou mal, galego ou castelán (que cada un é
libre de falar o que queira) o malo é esbardallar, que como recolle o Dicionario
da Real Academia Galega é “falar moito
dicindo parvadas”, e moito peor aínda é facelo en público e perante as
cámaras, que iso queda gravado e despois a comunidade internauta veo e
cabréase.
As polémicas declaracións sobre a lingua galega en Gran Hermano