As múltiples vantaxes administrativas e empresariais do software libre, a debate en Mugardos

A comarca de Ferrol converteuse a pasada fin de semana o eixe galego de divulgación dos usos e vantaxes da programación aberta. E foi desta maneira grazas ás VII Xornadas de Software Libre do Concello de Mugardos, cuxos temas a tratar foron moitos e ben variados, tal é a amplitude do radio de acción deste tipo de informática: software libre nas administracións públicas (onde se contribúe ao aforro e á sostibilidade), a falta de información xeneralizada sobre estas ferramentas libres, as descargas na Rede ou a convivencia empresarial de plataformas privativas e abertas.
Asemade, os encontros de Mugardos serviron para a presentar de xeito oficial á Asociación Comunidade O Zulo, organizadora do encontro e finalmente legalizada logo de sete anos de actividade.
As xornadas, nas que tamén se falou do emprego na Internet de ferramentas P2P (que abren portas nos ordenadores para o libre intercambio de ficheiros), desenvolvéronse de xeito presencial no salón de plenos de Concello e a través da rede cunha emisión en directo para toda a comunidade internauta.
Por certo que tamén está previsto que se envorquen na web de O Zulo as gravacións dos relatorios da xornada.
Amais do dito, a xuntanza deu acubillo a un achegamento ás plataformas Ubuntu 10.04 (a cargo de Óscar Amor) e Drupal (da man de Alberto Permuy). Asemade, deuse a coñecer polo miúdo o Proxecto Trasno (iniciativa para a tradución ao galego de ferramentas libres internacionais). O experto galego en software libre Roberto Vieito, vello coñecido desta web Código Cero, tamén acudiu ás xornadas para afondar nas moitas posibilidades de convivencia que, na súa opinión, amosan as dúas tendencias de desenvolvemento informático actual: a privativa e máis a aberta.