As operadoras melloran as conexións de Boiro coa despregadura da 4G e a 5G
xoves, 3 de novembro do 2022
Os
operadores de telefonía móbil Telefónica, Vodafone e Orange
informan que durante as vindeiras semanas van levar a cabo en Boiro o
proceso de implantación dos novos servizos de telefonía móbil de
nova xeración 4G e 5G, sobre as bandas de 800 e 700 MHz. Isto vai
permitir desfrutar de conexións móbiles de alta velocidade cunha
mellor cobertura no interior de edificios e en máis zonas.
O
Concello explica que para garantir a compatibilidade da nova
tecnoloxía coa televisión dixital terrestre (TDT), os operadores
puxeron en marcha unha entidade para solucionar calquera afectación
na recepción da sinal da televisión. O proceso de implantación,
que se está a realizar de forma paulatina en toda a xeografía
galega e estatal, pódese seguir na web habilitada www.llega700.es.
Esta
nova rede móbil, sinalan dende o Concello reflectindo datos das
operadoras, “vai proporcionar melloras significativas tanto na
velocidade de descarga como no envío de datos (fotos, música ou
contidos audiovisuais de alta definición así como sacar o máximo
partido ás aplicacións online)”. Vai introducir tamén
melloras fundamentais como a os relacionados con orografía
complicada onde tradicionalmente fallaba a cobertura e en zonas
interiores de edificios.