As xornadas Digit@lis achegan estes días unha xanela directa ao futuro da comunicación
venres, 2 de decembro do 2011
- Jennifer Preston, Isabel Suárez e Antonia Blanco
As xornadas Digit@lis
que se están a celebrar en Pontevedra (onte e hoxe) constitúen unha nova
oportunidade para parármonos e, antes de seguir adiante, avaliar o camiño
andado en materia de comunicación e información. Un camiño que, sen dúbida,
pasa por tres feitos recentes fundamentais: a posibilidade de sermos todos nós
informadores, a chegada das redes sociais e as súas moitas vantaxes de
participación e a constatación de que hai un novo tipo de lectora/lector que
opina, que usa novos dispositivos e que quere máis interactividade a atención.
Entre as conclusións que están
abrollar destas xornadas salientamos unha que entronca directamente co
devandito: os xornais de hoxe en día xa non teñen escusa para ignorar a quen os
le. Sobre isto reflexionou Jennifer Preston, directora de redes sociais de The
New York Times, durante a apertura da dita xuntanza, organizada pola profesora
Isabel Suárez co apoio da Vicerreitoría do Campus de Pontevedra.
A relatora, seguindo o
dito fío das novas posibilidades que brinda a rede, sinalou que a prensa en
papel debe ter clara presenza nas comunidades 2.0, pero con distinto xeito de
informar, facendo que a cidadanía participe na creación dos contidos. Agora, xa
non é o editor quen toma tódalas decisións, polo menos non nos medios que máis
atenden aos cambios da comunicación que imprimen as canles dixitais, senón que
son os lectores os que moitas veces teñen a derradeira palabra.
Na apertura das xornadas, que continúan hoxe
venres 2, tamén participou Antonia Blanco, vicerreitora do campus, quen
salientou o elevado nivel dos conferenciantes das xornadas, “que colaboraron desinteresadamente para facer
posible este evento”. Pola súa parte, Isabel Suárez fixo fincapé no enfoque
práctico do evento e a heteroxeneidade do público, “entre o que se atopan empresarios, autónomos, estudantes… pondo de
manifesto a proximidade da Universidade co mundo real e co seu tecido social”.
Amais de Preston, pasaron xa polas xornadas
Digit@lis Bieito Rubido, director do ABC, Lois Blanco, director xeral de La Voz
de Galicia, Lois Caeiro, director de El Progreso, Caetano Díaz, subdirector de
El Correo Gallego, e Manuel Ferreiro, director de El Ideal Gallego. Todos eles
participaron nunha mesa redonda sobre o futuro da información, achegando
diferentes puntos de vista sobre o porvir da prensa, para Blanco e Rubido
escasamente ligado ao papel, “ao que lle
quedan poucos anos de vida”, mais para Caeiro, Ferreiro e Díaz, trátase dun
porvir que pode abordar novos xeitos de facer compatíbeis os novos modelos cos
tradicionais.
Como dixemos, as xornadas proseguirán este
venres cunha mesa redonda integrada por expertos do mundo dixital 2.0, entre os
que se atopan os profesores da Universidade, José Carlos López Ardao e Daniel
Martí e blogueiros e tuiteiros como Manuel Gago, responsable
da web do Consello de Cultura, Jesús López Cortiñas, responsable de marketing online de Femxa, Lontzo Sainz,
responsable de networking en EITB.com
e Javier Pedreira, cofundador de Microsiervos, que, segundo informa a
Universidade de Vigo, “compartirán cos
asistentes as súas experiencias e proxectos nas redes sociais”.