As xornadas NovoMed 09 traerán ata Santiago a compañías pioneiras na innovación audiovisual

Os vindeiros días 9 e 10 de xullo, a Facultade de Ciencias da Comunicación da Universidade de Santiago de Compostela vestirase coas súas mellores galas para dar acollida ao foro Novos Medios e Contidos Audiovisuais NovoMed 09, que traerá á capital galega aos expertos e responsables dos programas máis innovadores en materia audiovisual, os cales nos avanzarán cal vai ser o futuro do sector.<br AGAPI, a Asociación Galega de Produtoras Independentes, organiza estas xornadas co patrocinio da Consellería de Economía e Industria da Xunta de Galicia e coa colaboración da Entidade de Xestión de Dereitos dos Produtores (EGEDA) e da Universidade de Santiago de Compostela (USC).
Os directivos de contidos de empresas coma Bren Entertainment, Continental Games, Televisión de Galicia, Youtube, Fox Channels, Vértice 360º, Enxebre Entertainment, Antena 3, Orange, e institucións coma a Impulsa TDT, a Entidade de Xestión de Dereitos dos Produtores (EGEDA) e o Instituto de Crédito Oficial (ICO) debuxarán o camiño de evolución do sector audiovisual centrándose en cinco temas: a televisión dixital (TDT), o novo marco regulador do sector audiovisual, os contidos multiplataforma, a animación dixital e os videoxogos e a rendibilidade do negocio audiovisual.
Os asistentes, que teñen máis información sobre o evento na páxina web de AGAPI, poderán coñecer aos responsables das empresas máis innovadoras e dos novos modelos de negocio do sector audiovisual presentes neste foro.
A actividade, que conta co recoñecemento de 1 crédito de libre configuración por parte da USC, é de balde, e vai dirixida aos profesionais de produtoras, distribuidoras e axentes de vendas, así como a estudantes en xeral interesados no audiovisual galego e internacional.