As xornadas sobre seguridade que comezan este xoves na Coruña rachan expectativas de asistencia
mércores, 23 de febreiro do 2011
- Raúl Benito, un dos relatores das xornadas, fotografado para unha entrevista no blog Un informático en el lado del mal
Esta semana toca
falar, e ben a fondo, de xeitos para procurar meirande confianza en todo o que
facemos na Rede, implicándonos a nós mesmos e, polo tanto, á nosa identidade.
Como cada ano, o grupo GSIC
da Coruña organiza as Xornadas de Seguridade na Facultade
de Informática da UDC, colaboradora activa deste evento. O congreso,
que dá comezo este xoves e esténdese até o sábado, inclúe os relatorios
especializados de costume e, ademais disto, un bo número de obradoiros e unha
cita (un hack contest) concreta para
pór a proba as habilitades dos asistentes. Segundo conta
a UDC, este ano superáronse tódalas previsións en materia de asistencia
logo de terse rexistrado un milleiro de persoas.
Entre os expertos
que van participar nas xornadas atopamos a relatores de especial renome (tanto
polo que son como polas entidades que representan), como Chema Alonso (Informática64), Ángel Prado (Microsoft) ou Raúl
Benito (Google), entre outros. O abano de temas será ben variado, aínda que
presentado baixo a ligazón común da seguridade en liña: virus, malware,
análise forense, criptografía, computación na nube, seguridade web, RFID... Polo
que respecta ao interese suscitado a nivel galego e estatal polas xornadas, cómpre
sinalar que este foi alén das expectativas da organización e mesmo botan por
terra as cifras achegadas esta semana dende esta mesma web
de Código Cero. De feito, apunta o GSIC, o número de rexistrados nestes
encontros achégase ao milleiro, entre estudantes da propia Facultade da UDC e
profesionais do sector das novas tecnoloxías da información e da consultoría
TIC. “Autobuses de institutos e universidades doutras provincias como
Asturias ou León tamén se achegarán para asistir ás xornadas”, informa a
UDC, que engade tamén que “tódolos
obradoiros rexistraron un cheo absoluto en tan só media hora desde o seu inicio
de rexistro, o que obrigou á organización a duplicar algúns deles”.