Até 130 profesionais traballan xa no departamento de Electrónica e Sistemas Intelixentes de Transporte do CTAG
xoves, 20 de febreiro do 2014
O Centro
Tecnolóxico de Automoción de Galicia, CTAG, conta xa con novas
instalacións de Electrónica e Sistemas Intelixentes de Transporte,
un macrodepartamento de I+D que dá acubillo a 130 tecnólogos
e abrangue unha superficie de máis de 7.000 metros cadrados de
espazo propiamente investigador (artellados en obradoiros,
laboratorios e estudos de deseño e desenvolvemento) e máis de
15.000 metros cadrados en pistas (espazos para pór a proba os nosos
sistemas de condución intelixente do centro). As novas instalacións,
inauguradas oficialmente este mércores polo presidente da Xunta,
implicaron un investimento do Goberno galego de 10 millóns de euros.
Nestas dotacións,
informouse durante a visita, lévanse a cabo actividades de
innovación e de validación de sistemas dirixidas a dar resposta ás
necesidades actuais e futuras do sector de motor. Ou sexa, estamos a
falar dunha nova interesante aplicación das novas tecnoloxías da
información, a comunicación e a automatización, encamiñadas desta
volta a xerar vehículos máis eficaces, máis seguros, máis
rendíbeis e máis respectuosos co medio ambiente. O obxectivo,
sinalouse, é confirmar ao CTAG como “un centro de referencia a
nivel internacional no eido da electrónica e o software. Asemade,
salientouse o seu potencial “como infraestrutura tecnolóxica
punteira”. Tamén se fixo fincapé no seu papel de fornecedor de
competitividade externa, beneficiando co seu coñecemento xerado as
restantes empresas e sectores, “comezando polo gran fabricante que
é PSA Peugeot-Citröen e continuando por todas as empresas de
compoñentes e as iniciativas emprendedoras que se están a artellar
neste eido industrial”.
Así o manifestou tamén
o presidente de CTAG, Antonio Santos, que dixo que estas instalacións
permitirán ao centro tecnolóxico “ofrecer solucións integradas
ao sector do motor de Galicia e desenvolver novos proxectos que
incrementen a competitividade desta industria a nivel nacional e
internacional, consolidando o emprego e permitindo que a I+D+i galega
que aquí se realiza sexa recoñecida en todo o mundo”.
Arestora, fíxose saber,
nesta división do CTAG traballan 130 investigadores e tecnólogos,
que participan nun bo feixe de proxectos europeos de I+D “e que
seguirán a ofrecer competencias avanzadas en sistemas ADAS (Advanced
Driver Asistance Systems) e automatización do vehículo,
conectividade, electromobilidade e confort interior, HMI (Interfaz
home-máquina), hardware, software e validación”. Para cumprir cos
seus obxectivos, as novas instalacións contarán con sete
laboratorios (ADAS, Conectividade, Compatibilidade Electromagnética,
Electromobilidade, Volume e Forma, Tecnoloxías HMI e Realidade
Aumentada, e Hardware in the Loop); unha sala de
Desenvolvemento de Funcións e Sistemas; áreas de Deseño
Electrónico e Fabricación de Prototipos Electrónicos; un estudo de
Deseño e Novos Conceptos; un Simulador de Condución; pistas de
probas de Sistemas Intelixentes de Transporte; prototipos de
investigación; e un Corredor Intelixente de Comunicacións
Cooperativas C2X Siscoga.