Até 30 novos investigadores participan nos retos do Campamento Tecnolóxico da Tecnópole
mércores, 2 de xullo do 2014
Tal
e como anunciamos
onte en Código Cero, comezaba esta semana a súa andaina o único
campamento tecnolóxico de verán que se celebra en Galicia, estamos
a falar do Tecnópole
Technological Workshops
(T2W), un encontro levado a cabo nas instalacións das Aulas
Tecnópole, en Ourense. A actividade -dirixida a rapaces e rapazas de entre 12 e 18 anos- estenderase até
o 11 de xullo e conta co patrocinio da operadora de cable galega R
e da empresa de telecomunicacións Coremain. Cómpre dicir que todos os asistentes (un total de 30) traballarán
durante estas dúas semanas no desenvolvemento de proxectos
tecnolóxicos con diferentes graos de complexidade segundo as súas
idades. Estes
proxectos foron presentados en detalle este mércores na sede da
Tecnópole.
Para
facer posíbel o desenvolvemento destas iniciativas, a formación
inclúe nocións sobre o deseño de aplicacións móbiles e
videoxogos, edición fotográfica e de vídeo, creatividade,
biotecnoloxía, etc. Os mellores de cada categoría terán asegurada
a súa participación na vindeira Galiciencia, a feira científica
que organiza Tecnópole no mes de novembro. Os obxectivos deste
campamento tecnolóxico consisten no desenvolvemento da capacidade
resolutiva e innovadora e na dinamización da axilidade mental e da
creatividade. Amais de procurar que os alumnos e alumnas adquiran
novos coñecementos tecnolóxicos, preténdese potenciar neles
actitudes coma o respecto mutuo, a colaboración e a socialización,
xunto con habilidades relacionadas con falar ben en público, etc.
Este ano estase a intensificar a práctica do inglés, coa presenza
dun profesor nativo que acompaña aos alumnos e alumnas todos os días
durante as comidas e en varios obradoiros e actividades.
Os
monitores e profesores son expertos en didáctica da ciencia e da
tecnoloxía e no resto das materias que se están a desenvolver na
academia. Durante o campamento os participantes practicarán tamén
actividades deportivas en equipo ao aire libre (natación, tenis ou
atletismo).
As
aptitudes comunicativas e a expresión corporal están a ter un oco
importante na axenda de todos os grupos de idade, con obradoiros para
falar en público e sesións de debate. Ademais, reciben educación
ambiental e aprenden hábitos de alimentación saudábeis mediante a
preparación de comidas sinxelas con produtos da horta ecolóxica.
Para
facérmonos unha idea, os 30 participantes deste campamento de verán
organizado polo Parque Tecnolóxico de Galicia-Tecnópole están a
construír xa foguetes impulsados por auga e pirámides con
espaguettis, proxectando figuras en 3D empregando un smartphone
e programando robots construídos con pezas e mecanismos LEGO
Mindstorms, entre moitas outra cousas. Así se fixo saber aos medios
na apertura oficial do campamento celebrada este mércores,
acompañada dunha xeira inaugural de traballo para os rapaces. Na
cita, logo de atender ás explicacións sobre as leis de Newton e os
principios básicos da aerodinámica, os participantes tiveron un
prazo de dúas horas para deseñar e construír os seus propios
foguetes propulsados por auga e aire. Unha vez rematados, puxéronos
a proba nunha competición lanzándoos e medindo as distancias
acadadas.
Para aprender como funcionan as imaxes
holográficas, os alumnos descubriron que hai detrás do truco
utilizado desde hai anos nas atraccións de feira e nos números de
maxia para facer aparecer pantasmas. Usando unha tablet
e unha pirámide holográfica, conseguiron converter imaxes planas en
imaxes 3D que se moven e flotan no aire. Asemade, empregando técnicas
de triangulación, os participantes foron retados a construír a
pirámide máis alta posíbel a base de spaghettis. “Os que máis
afinaron nos cálculos competiron entre eles, resultando vencedora
unha estrutura que acadou os 170 centímetros”, informa a
Tecnópole. Ademais, os campistas están a experimentar estes días
con robots construídos con pezas e mecanismos LEGO Mindstorms, co
reto de aprender a programalos para realizar diferentes funcións de
forma autónoma.