Até 425 persoas participan na XGN R Encounter, que acolle unha manchea de obradoiros e conferencias
luns, 11 de outubro do 2021
A
nova edición da XGN R
Encounter, que remata hoxe, está a ser
novamente un fervedoiro de novidades informáticas e confraternidade
arredor das TIC. É ademais un exemplo de como converter un evento
colectivo, participativo, interactivo e presencial (logo da edición
en liña de 2020), en modelo de seguridade sanitaria (cun completo
protocolo, favorecido polas grandes dimensións do recinto, que
implicou unha exhaustiva ventilación e máis a redución do aforo,
que baixou dos 932 acubillados en 2019 a menos de medio milleiro
agora).
A
Feira Internacional de Galicia ABANCA, en Silleda, acolle estes días
máis de 40 actividades lúdicas e formativas, que son achegadas ás
persoas non inscritas a través de Youtube e Twitch.
Os
seareiros da informática finalmente inscritos na party foron
425.
O
programa inclúe conferencias, charlas e obradoiros con temáticas
como as criptomonedas, a programación ou as claves do streaming.
Entre outra cousas, deuse a coñecer o proxecto Roteiro Maker, o cal
fixo “unha parada especial” na XGN R Encounter co obxectivo de
reforzar a arela formativa do evento. Esta iniciativa, protagonizada
por unha furgoneta equipada con tecnoloxías argalleiras,
percorre as zonas rurais e semirrurais de Galicia para dar a coñecer
o movemento Maker e potenciar a creatividade, a
innovación e o respecto polo medio ambiente.
Tamén
foron destacadas as actuacións musicais de Elesky Pablo Díaz,
gañador de Pasapalabra e violinista.
A
nivel técnico, a velocidade de conexión a Internet ofrecida pola
operadora R é de 20 Gbps. Esta cita é a quinta con R como
colaboradora e patrocinadora oficial, que de novo contou co apoio da
Consellería de Política Social da Xunta de Galicia, impulsora da
party. A XGN R Encounter está vinculada á rede de Encounters que a
Fundación Euskaltel impulsa desde hai máis de 25 anos e da que
forman parte a Euskal Encounter, a Gipuzkoa Encounter e a Araba
Encounter.
A
organización salientou “a alta participación” e “o gran nivel
mostrado” nas competicións de arte dixital, en categorías como
curtametraxe, gráficos 3D, ilustración e música dixital, concurso
de dobraxes e fotografía, retoque fotográfico, fast compos e
anime music vídeo. Os expertos en seguridade informática e
programación déronse cita no AI Contest, a competición de
software libre que incluíu retos que poñen a proba os seus
coñecementos e que rematou o domingo 10 de outubro. Tamén se deu
unha alta participación nas competicións de videoxogos.