Autoxuga pon en xogo unha revolucionaria app para reducir a contaminación do noso coche
mércores, 30 de xaneiro do 2019
Autoxuga
Móbil, empresa de Rianxo centrada no subministro de servizos
innovadores e tecnoloxías para o ámbito do motor e do mantemento do
automóbil, está a presentar estes días unha nova e revolucionaria
aplicación móbil que facilita ao máximo a condución eficiente,
reducindo o consumo de combustíbel e, polo tanto, a contaminación
do ar. A ferramenta para dispositivos, que
será presentada o vindeiro 7 de febreiro no Centro Demostrador TIC
de Santiago (entre as 16.30 e as 18.00 horas), é unha app
adaptábel a todo tipo de marcas de coches. A clave da ferramenta é
que converte o noso smartphone nun equipo de diagnóstico de
taller (mostra parámetros e elimina avarías nos automóbiles da
mesma maneira cós equipos de diagnoses profesionais).
Segundo
informa Autoxuga acerca do funcionamento da aplicación e das súas
principais claves, un dos puntos formes da mesma é que actúa
directamente no borrado de avarías esporádicas que aparecen nos
coches, un procedemento de aviso de mantemento que deriva, segundo
informan, en máis contaminación: “Se os usuarios de automóbiles
borrasen cada mes estes avisos, reducirían o consumo de carburantes
nun 20%, aumentarían a vida útil dos coches nun 200% e poderían
aforrar, só en España, uns 10 mil millóns de euros ao ano en
combustíbeis que a día de hoxe van directamente á atmosfera en
forma de contaminación”.
Outra
novidade que achega o desenvolvemento de Autoxuga, que ten un custe
de 40 euros, é que os usuarios da aplicación, a través dos seus
teléfonos móbiles, poden ter a posibilidade de acceder aos chequeos
que faga un usuario no seu coche en calquera recanto do mundo: as
avarías que ten e a imaxe do lugar onde realizou a comprobación.
Isto pódese ver a través da ligazón Avarías
coches nun mundo.
Segundo
informa Autoxuga respecto da presentación do día 7, esta aplicación
é de especial interese para condutores en xeral, talleres e persoas
con inquietudes medioambientais, profesorado, alumnado de FP e
universitarios.