Avansig dá a coñecer no CDTIC as vantaxes de uso da súa ferramenta csUrbanismo
luns, 3 de marzo do 2014
Avansig,
empresa xerada ao acubillo da Universidade da Coruña e especializada
en enxeñaría informática (deseño de novas ferramentas e
aplicacións nos eidos da informática e os sistemas de información
xeográfica), vai organizar este venres 7 de marzo unha xornada de
presentación sobre unha innovadora (e prometedora) ferramenta de
seu, coñecida como csUrbanismo.
A cita será no Centro
Demostrador TIC de Santiago (CDTIC) e, segundo apunta a empresa
galega, terá especial interese para profesionais dos eidos da
arquitectura e o urbanismo e tamén para as consultoras de enxeñaría
que redactan plans de ordenación. Con csUrbanismo, informa Avansig,
“queremos achegar aos equipos redactores dos plans urbanísticos
unha ferramenta de información xeográfica integral para a xestión
integral de proxectos”.
Esta ferramenta, engaden
os responsábeis da empresa da Coruña, “establece unha nova
metodoloxía e propón novas alternativas de análises e procesado da
información, sistematizando as fases de información e ordenación
urbanística, co que se reduce de xeito drástico o esforzo empregado
na execución de proxectos de ordenación territorial”. A xornada
dará comezo arredor das 10.00 horas coa intervención-presentación
a cargo de David Trillo, director executivo de Avansig. Logo será a
quenda de Alberto Mayán, director técnico da empresa, de que fará
(en dúas sesións) unha completa demostración funcional da
ferramenta.