COGAMI incrementou o seu labor de apoio en materia de trámites electrónicos coas administracións
venres, 13 de agosto do 2021
A
confederación galega COGAMI, a través da área de Promoción de
Autonomía Persoal, fixo
balance de dos seus servizos prestados en materia de trámites coas
administracións ao longo dos sete primeiros meses de ano,
servizos cos que se buscou facilitar as operacións das persoas con
discapacidade e das familias coas entidades públicas. Foi un
traballo principalmente dixital, debido á pandemia e á saturación
de demandas nos Servizos Sociais Comunitarios. Por esta razón, os
ditos colectivos tiveron que incrementar a súa asistencia a COGAMI
demandando apoios como o acompañamento para realizar xestións de
recursos na Administración.
O
balance puxo de manifesto varios datos relevantes. En primeiro lugar,
que debido á escasa atención presencial incrementouse a necesidade
de tramitar telematicamente dende a cidadanía, para solicitar citas
ou para a realización das propias xestións administrativas. En
segundo lugar, a obriga de operar en liña revelou a existencia dunha
importante fenda tecnolóxica entre estes colectivos, xa que “non
todas as persoas están formadas en competencias dixitais”.
No
que vai de ano, foron 342 as xestións de recursos realizadas por
COGAMI, superando as de anos anteriores por estas datas.
Asemade,
lévanse realizados 235 proxectos de intervención nos que se
atenderon a un total de 226 persoas, sendo 156 mulleres con
discapacidade. Estas actuacións realizadas con mulleres procuran
diminuír a existencia continuada de discriminación e prexuízos
inxustificados e invisibilizados que as privan da oportunidade de
exercer os seus dereitos en igualdade de condicións, como tamén se
realiza un acompañamento ás vítimas de violencia por atoparse
nunha maior situación de vulnerabilidade.