Change Makers busca en Galicia os futuros líderes da economía circular e as metodoloxías áxiles
mércores, 30 de marzo do 2022
Desde
a entidade estatal Fundación Equipo Humano crearon un programa
formativo que combina o uso de metodoloxías áxiles e a economía
circular, co obxectivo de xerar impacto e mellorar a competitividade
das empresas españolas. Trátase de Change
Makers, unha iniciativa para, en palabras da organización,
brindar apoio e capacitación aos profesionais nos novos (e
sustentábeis e tecnolóxicos) xeitos de producir e xerar riqueza. As
sesións máis recentes organizáronse en 6 edicións distribuídas
entre Galicia, Andalucía, Estremadura e Murcia, co obxectivo de
formar 93 changers. O programa conta cunha parte de
formación de 72 horas de duración que combina as metodoloxías
Visual Thinking, Lean Startup e a aprendizaxe
colaborativa por proxectos.
Co
obxectivo de “adaptarse ás condicións actuais derivadas da
COVID-19”, o programa realízase de maneira en liña, sendo Nicola
Cerantola, recoñecido experto en economía circular e creador da
ferramenta EcoCanvas, a peza central do equipo de profesionais e
formadores do mesmo.
As
persoas que trala formación adquiran a denominación de change
makers terán como “misión” ser axentes activos de cambio
para que, desde as empresas nas que traballen, “axuden a deseñar e
xestionar alternativas viábeis para o futuro da economía, do
planeta e da nosa sociedade”, segundo sinalan dende a Fundación
Equipo Humano.
Actividade
recente
Tras
cinco meses de formación a cabalo entre 2021 e 2022, as persoas
participantes finalizaron o curso de economía circular e
metodoloxías áxiles. A formación realizouse a través de Internet,
combinando sesións en directo con actividades en grupo e outros
contidos accesíbeis a través dunha plataforma de e-learning.
Ademais, cada alumno desenvolveu o seu propio proxecto fin de curso,
no que, coa axuda dun titor, planifica unha idea de empresa
sustentábel.
Estes
proxectos, serán presentados o día 8 de abril do 2022 nun Demoday,
no que os participantes, ademais de expor cadansúas contribucións
ante Nicola Cerantola, recibirán un certificado de finalización e
aproveitamento do curso, converténdose así oficialmente en axentes
de transformación circular.
Nova
edición
Segundo
informa a organización este verán comezará unha nova edición de
Change Makers, desta volta dirixida a persoas desempregadas. Para
participar neste programa, as persoas interesadas deben
preinscribirse a través da
web do programa. Para seren candidatas, son requisitos básicos
residiren en Galicia, Asturias, Andalucía ou Valencia, e estar
desempregadas e inscritas na oficina de emprego.