Chega La Nevera Roja Premium con máis de 130 restaurantes adheridos
venres, 10 de xullo do 2015
- Caroline Wakefield, directora executiva da división Premium
A plataforma en liña
para entrega de comida La Nevera Roja, creada polo vigués
José del Barrio e agora integrada en Rocket Internet, está a
complementar a súa actividade cunha nova achega en España, La
Nevera Roja Premium, dispoñíbel
polo de agora para as cidades de Madrid e Barcelona. O novo servizo,
que xa ten máis de 130 restaurantes adheridos, foi lanzando co
obxectivo firme de “revolucionar o negocio da entrega de comida en
liña en España”.
Segundo
informan os responsábeis da plataforma, a versión Premium foi “un
paso natural” na súa evolución. “Tralo éxito de La Nevera
Roja”, sinala Caroline Wakefield, directora executiva desta nova
póla de actividade, “fomos
testemuñas dunha crecente demanda de diversas opcións de comida de
calidade nas devanditas cidades”. Premium diríxese pois a
satisfacer esta demanda de diversidade. Isto, engade Caroline,
significa entre outras cousas que os establecementos van gozar dun
acceso directo a unha base de clientes moito maior e, como
consecuencia, ao aumento dos seus ingresos. E todo sen ter que
contratar aos seus propios mensaxeiros.
Por outra banda, explica
Caroline, a existencia dun servizo coma este deixa ceibes aos
restauradores para facer o que saben facer mellor: crear pratos. “La
Nevera Roja Premium”, di, “encárgase do resto”. Ou sexa,
de recoller a comida e entregala aos clientes.
Todas as entregas
realízanse en moto coa axuda dun avanzado algoritmo tecnolóxico que
optimiza o proceso. Para asegurar que os produtos manteñan a súa
alta calidade e cheguen ao destino dentro dunha media de menos de 38
minutos, os pedidos limítanse a unha área delimitada.
Lembrar que a empresa de
raizame galega foi adquirida pola plataforma alemá Rocket
Internet en febreiro deste ano co 100% do capital social
transferido. A filial Premium introduciuse en España coa intención
de ampliar e diversificar o negocio.
Como funciona?
La Nevera Roja Premium
ofrece distribución eficaz aos establecementos de calidade
seleccionados previamente e que arestora non teñen o servizo de
entrega de comida. Na
web do servizo os clientes piden a súa comida entre unha ampla
escolma de restaurantes referenciais que están dispoñíbeis dentro
da súa área; a plataforma encárgase do resto. Os seus repartidores
implicados recollen os pedidos e lévanos aos clientes empregando
motos personalizadas coa marca. Os clientes poden pagar os seus
pedidos con cartón de crédito ou PayPal.