Colle impulso o polo de innovación da USC e Gradiant a prol do noso tecido agroalimentario
venres, 16 de decembro do 2016
Este xoves recibiu un
novo e importante pulo a alianza innovadora do Centro Tecnolóxico
Gradiant e a Universidade de Santiago (Campus Terra, USC) a prol da
economía do noso rural, máis polo miúdo a prol da industria
agroliamentaria. Concretamente, o Polo de Innovación Dixital
impulsado polas dúas ditas entidades aprobou a súa estrutura de
goberno, así como a creación de seis grupos de traballo que
respondan ás diferentes demandas do sector. Esta media ducia de
grupos son os seguintes: Prospectiva e Intelixencia, Oferta e
Demanda, Proxectos I+D+i, Produción Agraria, Produción Gandeira, e
Industria Agroalimentaria. Segundo fixeron saber Gradiant e o Campus
Terra, estes seis eidos de traballo serán “estruturas dinámicas”
con capacidade de evolucionar a medida que avance o proxecto e xurdan
novas necesidades. Como lembraremos, o
Digital Innovation Hub foi dado a coñecer en outubro,
salientándose daquela o seu obxectivo firme de achegar recursos e
solucións que favorezan a futura sustentabilidade e rendibilidade do
agro galego.
Segundo engadiron este xoves a USC e Gradiant, a
creación dos devanditos grupos partiu dunha enquisa previa á que
foron sometidos os diversos axentes do sector (empresas, asociacións
profesionais, cooperativas, produtores, clusters, universidades e
centros tecnolóxicos). Na xuntanza de onte aprobouse tamén a
estrutura de goberno do polo, encabezada pola secretaría técnica
que conforman Campus Terra e Gradiant.
O encontro, celebrado no Centro Singular de
Investigación en Tecnoloxías da Información (CiTIUS) de Santiago
de Compostela, estivo presidido polo vicerreitor de Desenvolvemento
Científico e Tecnolóxico do campus de Lugo, Andrés Barreiro Lois,
e polo director xeral de Gradiant, Luis Pérez Freire. Enrique Rohrer
acudiu en representación da Axencia Galega de Innovación a esta
xuntanza de traballo, que foi clausurada polo vicerreitor de
Coordinación do campus de Lugo, Javier Bueno Lema.
Segundo explicou a USC, neste Digital
Innovation Hub conflúen pola banda da demanda un sector
produtivo e transformador aberto á incorporación de tecnoloxías e
servizos innovadores adaptados á súa realidade produtiva; e pola
banda da oferta, a conxunción de provedores tecnolóxicos e de
servizos así coma dos centros de coñecemento e innovación
xeradores desas solucións e melloras que demanda o sector. A USC e
Gradiant tamén lembraron que “a iniciativa establece unha dinámica
proveitosa de colaboración aberta e áxil, da que cada parte
interesada pode tirar beneficios específicos”. Estas vantaxes son:
maior competitividade para o sector agroalimentario, oportunidades de
negocio e potencial exportador para os provedores tecnolóxicos ou
oportunidades de capitalización do coñecemento existente nos
centros de investigación e innovación galegos.