Comeza na FIC e na ESEI o campamento tecnolóxico Aldaba-TIC Camp
luns, 26 de xuño do 2023
Este luns 26 de xuño arrancou (de xeito
simultáneo) na Escola Superior de Enxeñaría Informática do Campus
de Ourense (ESEI) e na Facultade de Informática do Campus da Coruña
(FIC) o campamento de verán
Aldaba-TIC Camp, destinado a fomentar as vocacións STEM e
contribuír á igualdade de xénero neste eido. En
cada una das cidades participa nesta iniciativa 36 nenas e nenos de 6
a 12 anos, o 80% mulleres.
A actividade, financiada para os dous campus polo
Consello Social da Universidade da Coruña, forma parte da
programación da Cátedra Aldaba WIB: Women, ICT & Business,
posta en macha en 2019 polas universidades de Vigo e A Coruña e a
empresa Aldaba co obxectivo de potenciar e enriquecer o progreso das
TIC (Tecnoloxías da Información e a Comunicación) promocionando
unha crecente participación das mulleres no seu desenvolvemento e
establecendo canles bidireccionais de colaboración entre a academia
e a empresa.
“O campamento Aldaba-TIC Camp responde a un dos
obxectivos principais da Cátedra Aldaba que é lograr unha maior
integración das mulleres na informática, un rifo moi deficitario
neste senso, por iso nel teñen preferencia as nenas, que ocupan un
80% das prazas. Non queriamos facer un campamento só de rapazas pero
si que queriamos contribuír a que as nenas, que a medida que teñen
máis idade se afastan da tecnoloxía, a vexan como algo positivo,
que a coñezan e que polo tanto máis adiante se poidan propor
estudar esta carreira”, comenta Alma María Gómez, profesora da
Escola Superior de Enxeñaría Informática de Ourense e codirectora
desta cátedra xunto a Virginia Mato (UDC). A codirectora salientou
“a excelente acollida” que tivo esta iniciativa nesta primeira
edición, apuntando como as prazas dispoñíbeis esgotáronse ás
horas de abrirse o prazo de matrícula, o que fixo que a organización
ampliase das 30 prazas inicialmente previstas ás 36.
O Aldaba-TIC Camp desenvolverase ata o venres 30
en horario de 9 a 14 horas no edificio Politécnico do Campus de
Ourense. Está impartido por monitoras y monitores de PlayCodeAcademy
e ao longo do seu desenvolvemento contará coa participación das
investigadoras Patricia Concheiro e Carmen Miranda (UDC) e Lorena
Otero e María Encarnación González (UVigo). Os obradoiros do
campamento, que xoga coa idea de preparar unha misión para viaxar a
Marte, estarán adaptados por idades pero entre as actividades que se
propoñen están adestrar drons de recoñecemento, programar
aplicacións de interacción e robots e fabricar un foguete e
ferramentas 3D. Para conseguilo, as e os rapaces utilizarán
ferramentas como Lego, Arduino, Scratch, impresoras 3D ou kits de
robótica.
O obxectivo último desta actividade é espertar e
“desenvolver nas e nos participantes o interese pola tecnoloxía e
que a consideren algo atractivo e próxima, ademais de comprobar a
súa utilidade”.