Como integrar o Machine Learning no noso negocio, ao detalle en Vigo e na Coruña
martes, 28 de maio do 2019
As
máquinas están aquí para quedar. E máis tendo en conta o que
prometen facer en canto crucen definitivamente a barreira da
operatividade total, coa chegada do novo estándar de comunicación
(5G), de máis e mellores ferramentas de análise masiva de
información e do empurrón aos obxectos conectados (IoT,
Internet of Things). As máquinas e as tecnoloxías intelixentes
son unha oportunidade (permitirannos tomar as mellores decisións a
todos os niveis), pero tamén un reto: abriranse camiño no día a
día das empresas e, para que este camiño sexa racional e de
utilidade, farán falta profesionais especializados. Disto estase a
ocupar a consultora galega Vitae, que organiza estes días (en Vigo e
na Coruña) as novas edicións do seu Curso de Solucións con Machine
Learning.
A
edición
de Vigo (segunda edición do curso) será no Centro Social Afundación
de Abanca, os días 7, 8, 14 e 15 de xuño. Pola súa banda, a
convocatoria da Coruña (a terceira) será no Hotel Attica 21 os días
28 e 29 de xuño e, tamén, os días 5 e 6 de xullo.
Ambas
accións formativas abranguerán 20 horas de adestramento para
mostrarnos as principais aplicacións do ML e amosarnos como
integralas no noso negocio.
Para quen non o saiba a estas
alturas, o Machine Learning é o ámbito de investigación
que se centra en crear programas capaces de xeneralizar
comportamentos nas computadoras, é dicir, que fai realidade a
aprendizaxe de pautas para rendibilizar e mellorar cousas como
sistemas de busca, análise de textos, análise de redes sociais,
recoñecemento de obxectos e facianas, procesado do ADN,
recoñecemento da fala, analítica de datos médicos ou aplicacións
para a intelixencia do negocio.
Ademais,
alén do seu papel científico, o Machine Learning ten moitas
potencialidades para os sectores da banca, da medicina, do motor, das
vendas ou das telecomunicacións, entre outros moitos.
Segundo
explican dende Vitae, a finalidade deste curso é introducir ao
alumnado no mundo do ML para que saiba diferenciar que problemas de
negocio son susceptíbeis de seren resoltos mediante algoritmos de
aprendizaxe máquina, e como asociar cada tipo de problema co
algoritmo axeitado, e, tamén, como preparar os datos para obter os
mellores resultados deses algoritmos. “Todo isto dende un punto de
vista práctico, sinxelo e botando man de exemplos reais”.
A
persoa encargada de impartir estes contidos será Antonio Soto
Rodríguez, enxeñeiro en Informática de Sistemas pola Universidade
da Coruña e profesional con máis de dúas décadas de experiencia
como consultor técnico experto e certificado, achegando formación
na Universidade Microsoft e a empresas e organismos como a NASA,
NASDAQ, PEMEX, SERGAS, Citroen, CEAGA, Inditex, Ferroplast, Banco
Popular, ABANCA, Xunta de Galicia ou Abertis.