Como tirar proveito da neurociencia para xuntar os equipos máis axeitados, ao detalle da man de Vitae
mércores, 20 de xuño do 2018
Pode
a neurociencia facer algo polos que buscamos as/os profesionais TIC e as/os
compañeiras/os de traballo que mellor encaixen nos nosos proxectos? Sen
dúbida que si. E máis se temos que en conta que esta disciplina, a
neurociencia, adícase a estudar a fondo o comportamento do noso
cerebro (a nosa principal ferramenta), poñendo o foco nas súas
capacidades xa coñecidas e botando luz sobre outras que fican por
desvelar. Nesta liña de estudar as potencialidades de cadaquén para
xerar respostas, coñecemento e comunicación, cada profesional coas
súas particulares e importantes potencialidades, é onde se sitúa o
Curso
de Avaliación e Selección Avanzada de Perfís TI (e non TI)
baseadas na Neurociencia que organiza novamente Vitae Consultores
e que vai pola súa décima edición. Celebrarase na Coruña (Hotel
Attica 21) os días 9, 10, 16 e 17 de xullo e terá 20 horas de
duración.
Con
este curso tentarase buscar solucións e repostas para preguntas coma
estas: Como saber onde encaixará mellor unha persoa? Como coñecer
que tipo de traballadoras e traballadores require cada proxecto? Que
características específicas demandar e como formulalas da mellor
maneira posíbel? Para aclarar zonas escuras e adestrarnos na toma
das máis óptimas decisións é para o que se convoca novamente o
devandito obradoiro, moi indicado para directores de proxecto e
profesionais dos recursos humanos.
A
actividade formativa pon ao noso alcance recursos para emendar unha
das principais eivas da análise profesional destes días: a ausencia
de instrumentos axeitados para valorar que tipos de talentos ten un
profesional candidato a formar parte dun proxecto ou empresa. Tamén
se busca dotar aos directores de proxectos e aos profesionais de
recursos humanos das ferramentas precisas para saber formular as súas
necesidades e interpretar, tamén, as diferentes propostas que se
fagan en resposta a esas necesidades.
Segundo
explican dende Vitae, o primeiro paso para calibrar a outro
profesional será aprender a calibrarnos a nós mesmos. “Coñecéndonos
deste xeito acadaremos meirande obxectividade na avaliación doutras
persoas”, sinalan dende a consultora, engadindo que neste curso
subministraranse as ferramentas e recursos máis indicados para
lograr o autocoñecemento e para o exame doutros profesionais, sexa
cal sexa o modelo de avaliación do desempeño do que se bote
finalmente man.
Para
Vitae, é unha realidade incontestábel que o sector das novas
tecnoloxías da información (o sector TI) demanda cada vez máis
profesionais dos dispoñíbeis no mercado laboral, o que xera
tensións nas empresas en canto a dar cumprido cos compromisos
profesionais en calidade e prazo cos clientes de seu e en controlar
os custes salariais e a equidade interna dos mesmos.
O
curso que presenta Vitae céntrase “na eficacia, en que facer, máis
que na eficiencia, en como facer, para seleccionar candidatas/os e
avaliar o desempeño dos nosos profesionais en contornas de escaseza
de traballadores, aínda que ambas as facetas, a eficacia e a
eficiencia, son necesarias para o éxito nos procesos de selección e
avaliación”.
O
curso virá da man de Marcos Carbonell, profesional con máis de tres
décadas de experiencia nos sectores do deporte, as novas tecnoloxías
e os recursos humanos. Carbonell é diplomado en Empresariais, máster
en Recursos Humanos e posgrao en Marketing e en Organización de
Empresas. Dende 2006 é socio director de Vitae Consultores e tense
responsabilizado, directa ou indirectamente, de máis de 1.000
procesos de selección cunha taxa de máis dun 90% de éxito.