Convocadas para 2015 un milleiro de prazas para obter a certificación de competencias en ofimática
luns, 5 de xaneiro do 2015
Este ano que comeza temos ao alcance da
man unha boa oportunidade para incrementar a nosa experiencia en
ferramentas de creación e xestión de documentos, e tamén para ter
perfectamente acreditada esa aprendizaxe. Segundo informou esta fin
de semana a Axencia para a Modernización Tecnolóxica de Galicia
(AMTEGA), en
2015 convocaranse preto de 1.000 prazas para os cursos de formación
precisos para obtermos a certificación galega en competencias
dixitais en ofimática (CODIX). Este certificado, explica a
Axencia, acredita a formación nesta materia da persoa titular ante
calquera instancia pública ou privada.
Segundo engade o departamento que
dirixe Mar Pereira, o obxectivo en 2015 é lanzar dúas convocatorias
para os cursos de formación a distancia en marzo e setembro, e
outras dúas convocatorias de exames de tipo presencial en abril e
outro “para aqueles cidadáns que xa posúan os coñecementos
necesarios ou opten pola modalidade autoformativa”. Estas citas
serán publicadas no Diario Oficial de Galicia e a través da
web da rede CeMIT unha vez rematadas as probas convocadas para o
ano 2014. Segundo engade a Axencia, a derradeira semana de xaneiro é
o prazo elixido para o desenvolvemento das probas presenciais para a
obtención do CODIX, exames aos que están chamados os 360 cidadáns
que acadaron praza no curso de teleformación lanzado a través da
rede CeMIT a finais de 2014.
Polo que respecta aos contidos a
impartir, son os do Plan Formativo Ofimático de Galicia, composto
polas cinco unidades nas que se estrutura o módulo formativo
MF0233_2 Ofimática do Repertorio Nacional de certificados de
profesionalidade:
· Sistema operativo, busca da
información: internet/intranet e correo electrónico (30 horas)
· Aplicacións informáticas de bases
de datos relacionais. LibreOffice Base (50 horas)
· Aplicacións informáticas para
presentacións: gráficas de información. LibreOffice Impress (30
horas)
·Aplicacións informáticas de
tratamento de textos. LibreOffice Writer. (30 horas)
·Aplicacións informáticas de follas
de cálculo. LibreOffice Calc (50 horas)