DEV fortalécese con dez novas empresas de videoxogos, incluída a galega Three Golden Monkeys
mércores, 23 de xuño do 2021
A
asociación española de
empresas de videoxogos DEV vén de fortalecer a súa actividade e
os seus obxectivos con dez novas incorporacións, co que suma xa 90
asociados de todos os recantos da xeografía estatal. Entre estas
novas adhesións inclúese a
da galega Three Golden Monkeys, con sede en Vigo.
A
maiores, recibiu a incorporación de Axes in Motion, Brytenwalda
Studios, Fas3 Estudios, Killbug Studio, Naduku, Odders Lab, Saona
Studios, Vermila Studios e AWS Game.
Volvendo
a Three Golden Monkeys, é unha empresa de desenvolvemento de
videoxogos e tecnoloxía de comercio electrónico con sede na cidade
de Vigo. O equipo provén do mundo da mercadotecnia dixital e do
desenvolvemento de software multitecnoloxía, con máis de 8 anos de
experiencia na industria do videoxogo a través dos estudos
independentes MIMO Games e Altivasoft. Desenvolven videoxogos para
plataformas móbiles con máis de 40 millóns de descargas na súa
traxectoria no sector.
DEV
representa os intereses dun centenar de empresas desenvolvedoras de
videoxogos tanto españolas como internacionais con sede en España e
entidades comprometidas coa evolución deste sector. Ten como obxecto
“avogar polo seu recoñecemento institucional como industria
estratéxica, altamente tecnolóxica, motor de novos modelos de
negocio, xeradora de emprego e expoñente internacional da nosa
cultura”.