Denodo nomea a Paul Moxon novo xefe de produto da compañía
xoves, 7 de novembro do 2013
Segue a chuvia de
novidades acerca dos plans de espallamento e fortalecemento da galega
Denodo no exterior. Se hai uns
días falabamos das fichaxes de Marta
Salvador e Raúl
Villares, como exemplos dunha ambiciosa política de renovación
e autoimpulso internacional, agora é a quenda de Paul Moxon, que
vai ser xefe de produto da compañía de tecnoloxías virtualización
que dirixe o coruñés Ángel Viña, recentemente mergullada en
proxectos de optimización de
empresas ligadas á Seguridade Nacional dos EE UU ou do
propio Departamento de Vivenda do país. Volvendo a Moxon, dicir
que se trata dun profesional que atesoura máis de 25 anos no eido do
desenvolvemento software, sendo este fondo coñecemento do sector
unha das grandes bazas do seu novo cargo en Denodo. E co engadido de
que se trata dun sector que está a medrar por enriba dos dous
díxitos en case tódolos países do mundo, informa a firma galega.
Sinalar tamén que Paul
Moxon adicou a maior parte da súa traxectoria profesional a
traballar con tecnoloxías de integración de aplicacións e de
datos, ao pasar de DCE, CORBA, ESB e servizos web á nube e ás
tecnoloxías móbiles. Asemade, pasou por algúns dos principais
provedores de programas de integración, tales como BEA Systems,
Progress Software, IONA Technologies e Axway. Tamén empregou varios
anos traballando como consultor en grandes proxectos de integración
con empresas como Bechtel, Saudi Aramco, AT & T Wireless, e
Reuters.
En palabras do propio
Paul Moxon, “a miña incorporación a Denodo, permitirame aplicar
os meus coñecementos do mundo do software e a tecnoloxía á miña
nova actividade”. E engade: “Denodo está a facer unha forte
aposta por todo o relacionado con levar os datos á nube para que
estean dispoñíbeis en calquera intre e a través dun acceso
multidispositivo, e é precisamente nesta contorna onde a miña
experiencia servirá para seguir crecendo e desenvolvendo solucións
que axuden aos nosos clientes a mellorar o seu rendemento e
eficacia”.