Economía impulsará o polo tecnolóxico-dixital da Coruña
venres, 25 de outubro do 2019
O
conselleiro
de Economía, Francisco Conde, presentou onte no Parlamento as contas
para o vindeiro ano: un plan de acción que suma preto de 600
millóns de euros (un 5% máis ca no 2019) para impulsar, dixo, o
emprego de calidade, a competitividade das empresas, a innovación e
a internacionalización. O obxectivo, engadiu, “é seguir
construíndo unha Galicia máis preparada, máis innovadora e máis
verde”. Respecto das Tecnoloxías da Información,
contémplase un pulo relevante á Cidade das TIC da Coruña e ao
tecido produtivo aeroespacial con centro de operacións nas Rozas
(Lugo).
Dos
600 millóns de euros, 210 millóns serán adicados á Galicia
innovadora. Ao abeiro disto, prolongaranse os impulsos a polos
estratéxicos como o do motor (apoiando o desenvolvemento de novas
tecnoloxías relacionadas co vehículo eléctrico e apostando pola
mobilidade eficiente), o polo naval (para avanzar no modelo de
Estaleiro 4.0); ou o Polo Aeroespacial de Galicia (que contará con
15,5M€ para seguir avanzando no seu desenvolvemento).
Ao
tempo, o conselleiro anunciou a continuidade dos Hubs de Innovación
Dixital e o lanzamento dunha nova convocatoria de axudas dirixida ás
empresas participantes para proxectos de I+D+i (7,5M€). Tamén se
procederá ao lanzamento e consolidación de polos noutros eidos.
Por
exemplo o polo das TIC da Coruña, que “poderá acceder a fondos
recollidos nestes orzamentos para comezar a desenvolverse e
contribuír á modernización da base industrial do sector e á
mellora das súas capacidades competitivas”, salientou Conde.
Ou o
polo da biotecnoloxía de Santiago de Compostela, que contará cunha
nova aceleradora para o achado de novos fármacos (a Business Factory
Pharma); e avanzarase no polo termal e da enerxía a través do
Ecobarrio de Ourense e da Lei de aproveitamento lúdico das augas
termais.
Ao
abeiro das contas do ano vindeiro, tamén se brindará un “importante
respaldo” ás pequenas e medianas empresas, a través do apoio
integral que lles proporcionará a nova Estratexia PEME, con 2,5M€
para desenvolver accións de formación, bonos de innovación ou
accións de sensibilización e divulgación, así como follas de ruta
individuais.
Ademais,
mantense o compromiso co desenvolvemento da Industria 4.0 para contar
cun tecido de maior tamaño e que aposte máis pola
internacionalización e a diversificación: “Con máis de 45M€
para apoiar novos investimentos e ampliar os existentes e 34M€ para
ferramentas que permitan reforzar as capacidades competitivas das
empresas galegas”.