Educación e NTT Data lanzan a 3ª edición do Mestrado de FP Dual en IA e Big Data
martes, 19 de decembro do 2023
A
Consellería
de Cultura e Educación e a empresa NTT Data porán en marcha en 2024
a terceira edición do Mestrado (Master) de FP Dual en
Intelixencia Artificial e Big Data. O conselleiro Román
Rodríguez, e o director executivo (CEO) da compañía en España,
Víctor López-Barrantes, asinaron este martes 19 de decembro o
convenio para a reedición desta formación no Instituto IES Fernando
Wirtz Suárez da Coruña.
Rodríguez
fixo saber que “este tipo de acordos son a base para que as
ensinanzas de FP Dual colleiten unha empregabilidade de case o 100%”.
E engadiu: “Apostamos por combinar a formación da maior calidade
nos centros coa cualificación que ofrece a experiencia de estar
nunha empresa, asimilando en tempo real as novidades que se producen
no sector”, salientou. “Isto é especialmente relevante nun
ámbito como o da intelixencia artificial, que se actualiza día a
día”, destacou.
O
Mestrado oferta 20 prazas e conta con 600 horas lectivas de formación
curricular, 400 delas (o 67%) desenvolveranse no Instituto IES
Fernando Wirtz Suárez e as 200 restantes (o 33%) na empresa.
Durante
a súa realización, os alumnos fórmanse en competencias como a
programación e a aplicación de sistemas intelixentes que optimizan
a xestión da información e a explotación de datos masivos, sempre
respectando o acceso seguro así como os principios éticos e legais
establecidos.
Trala
sinatura do acordo Rodríguez conversou coas alumnas e alumnos que
están a cursar agora esta formación e con parte dos da primeira
promoción, dos que o 60% están a traballar na empresa NTT Data.
Tamén
engadiu que o dito Mestrado ofértase este curso en catro centros.
Deles, o Fernando Wirtz é o único que o oferta tanto na modalidade
ordinaria como en FP Dual. O Centro Integrado de FP A
Carballeira-Marcos Valcárcel (Ourense) ten tamén en marcha un
proxecto dual neste mestrado.
A
maiores, o Instituto IES de Teis (Vigo) impárteo en dous grupos, un
ordinario presencial e outro a distancia, e o IES San Clemente de
Santiago de Compostela un grupo a distancia.