Ellasdenuncian.com cumpre un ano de vida con máis de 1.000 usuarias
xoves, 14 de xaneiro do 2010
- Juan Merodio, fundador da web, recibindo un premio da Universidade Europea de Madrid
A Rede ten un aquel de idoneidade para quen estea nunha situación complicada en termos de parella e queira procurar apoio, recursos, persoas que estean a pasar polo mesmo e, sobre todo, unha vía de escape. Así o demostran os bos resultados de webs como Ellasdenuncian.com, espazo que vén de enumerar os logros acadados ao longo do seu primeiro ano de vida e que, como o seu propio nome indica, encamíñase a achegarlles acubillo dixital ás mulleres maltratadas. O portal, xurdido en xaneiro de 2009 para loitar contra a violencia de xénero, conta a día de hoxe con máis de un milleiro de usuarias rexistradas e unha bagaxe de 6.000 mensaxes xeradas ao seu abeiro. A web, que non ten arela de lucro, foi obxecto recentemente dun galardón de mans da Universidade Europea de Madrid (UEM), que salientou o seu labor de mocidade comprometida co desenvolvemento social das súas comunidades.
Por certo que este premio, indica o equipo responsable de Ellasdenuncian, vailles servir de axuda para recibir a formación axeitada para cubrir as súas necesidades de medre, innovación e desenvolvemento, amais de favorecer un contacto máis directo coas ONGs e coas empresas potencialmente interesadas en colaborar coa iniciativa.
“Ao longo destes doce meses”, indica o equipo da web, “a páxina recibiu moitas visitas e foi testemuña do medre de moitas das súas seccións, algunhas delas por propia petición das usuarias”. É o caso do apartado con formato de foro Axuda coa túa experiencia, onde as internautas envorcan os seus esforzos en axudar e apoiar a outras que se atopan nunha situación complicada de maltrato, sinala Juan Antonio Merodio, fundador da plataforma. Outra das seccións que obtivo e obtén especial seguimento é Consultas xurídicas, onde unha avogada asesora de balde a toda persoa que o solicite sobre os pasos a dar en caso de querer denunciar un caso de maltrato, entre outros aspectos legais.