Elogia gaña o Premio Especial de eAwards México 2014
venres, 20 de xuño do 2014
A axencia de
mercadotecnia para comercio electrónico Elogia,
que ten unha das súas sedes principais en Vigo, foi galardoada este
mércores 18 de xuño co Premio Especial que outorga o eShow México
nos eAwards México 2014. Este recoñecemento, informa a empresa que
dirixe o galego Rubén Ferreiro, distingue a traxectoria de 13 anos
de Elogia no mercado da mercadotecnia dixital mexicano (15 anos en
España), “o seu esforzo por proxectar o comercio electrónico na
sociedade mexicana e o seu bo traballo cos seus clientes actuais”.
O premio foi entregado
por Agustín Torres, director de The eShow México, e recolleito por
Rubén Ferreiro, CEO da axencia Elogia, quen agradeceu o galardón e
sinalou que este “supón un recoñecemento ao noso traballo e un
impulso máis á nosa firme aposta polo mercado mexicano”.
Lembrar que a axencia ten
oficina en México desde 2001, onde arrincou cun negocio de
mercadotecnia dixital até evolucionar ao actual modelo de axencia.
Na actualidade conta con máis de 20 profesionais traballando en
Cidade de México e os seus plans son medrar “en porcentaxes de
dous díxitos cada ano nos vindeiros exercicios”, asegurou
Ferreiro.