En Ferrol remata con éxito o programa municipal para combater con tecnoloxías a soidade dos maiores
xoves, 27 de maio do 2021
O
Concello de
Ferrol anunciou o remate do seu programa de Estimulación Cognitiva
para rematar coa soidade das persoas maiores, agravada pola
pandemia, botando man das novas ferramentas da información e a
comunicación. A edil de Benestar Social, Eva Martínez Montero,
apuntou que o plan comezou con 24 usuarios da residencia de Caranza e
rematou con preto de 35 como consecuencia “dos bos resultados”
entre os beneficiarios. Anunciou tamén que o Concello segue a
traballar en actividades análogas que serán activadas en datas
vindeiras.
O
programa Estimulación Cognitiva comezou a súa andaina a finais do
pasado ano para mellorar o lecer e a comunicación dos maiores ante
as limitacións e as restricións impostas pola COVID-19, tal e como
explicou esta mañá a concelleira de Benestar Social, Eva Martínez
Montero. A iniciativa, que comezou como experiencia piloto,
contemplou formación no manexo do móbil, da tableta e da aplicación
Alexa. Inicialmente inscribíronse 24 residentes e rematou con preto
de 35 “tras observar os residentes os bos resultados nos seus
compañeiros”, explicou a concelleira
Unha
psicóloga experta en xerontoloxía foi a encargada de impartir o
programa municipal, que conseguiu aumentar a autonomía das e dos
participantes no manexo das tecnoloxías en canto á recepción e
emisión de chamadas, o cambio do volume e melodías, o uso do
Whatsapp e incluso o manexo de aplicacións sobre hábitos saudábeis
ou para ler libros.
En
canto ao aprendizaxe no uso das tabletas, as responsábeis do
programa comprobaron que os usuarios adquiriron habilidades no uso do
Skype e de outras aplicacións destinadas a mellorar hábitos
saudables e a estimular as funcións cognitivas.