En marcha a nova web da Deputación de Pontevedra
xoves, 15 de decembro do 2016
Este
xoves pola mañá os visitantes da páxina web da Deputación de
Pontevedra, depo.es, foron
“recibidos” por unha serie de cambios importantes, tanto no
estético (máis visualidade, máis limpeza e máis facilidade para
abranguer toda a web dunha soa ollada) como no funcional (menos
atrancos para o uso e a navegación, máis accesibilidade, máis e
mellores ferramentas para a participación, máis transparencia, máis
comodidade no uso das ferramentas e servizos). Todos estes cambios
son os relativos á recente remodelación do sitio en liña da
entidade provincial, transformacións
que foron avanzadas os días pasados pola propia Deputación pero
que
se puxeron hoxe mesmo a disposición da cidadanía.
Como
sinalamos esta semana, a remodelación do espazo dixital foi
desenvolvida polos propios servizos de comunicación e de novas
tecnoloxías da institución provincial. Amais das novidades postas
en xogo en materia de navegación, transparencia (búscase que toda a
cidadanía poida coñecer o traballo da Deputación) e participación,
houbo un esforzo importante no eido de facer a visita o máis cómoda
e sintetizada posíbel (a idea foi reducir os campos e ordenar
axeitadamente os contidos para facilitar a lexibilidade o uso).
Outra
das novidades tecnolóxicas que presenta a nova web radica na súa
adaptación aos distintos formatos de navegación, non só dende os
computadores senón tamén dende tabletas ou teléfonos móbiles.
Carmela
Silva, presidenta da Deputación, lembraba esta mesma semana a “clara
aposta” que está a facer a entidade provincial polas novas
tecnoloxías: "Estamos activamente en Twitter, Facebook,
Youtube, Instagram, Periscope e Linkedin. En Twitter, xa somos a
Deputación galega con maior número de seguidores, 7.276, e acadamos
case 400.000 impresións mensuais nesta rede social”. Esta vertente
“social” da Deputación ten, como era de agardar, unha fonda
pegada na nova páxina web da Deputación.