En marcha cartulina.es, a semente dunha comunidade sobre manualidades con raizame galega
mércores, 28 de maio do 2014
Dende A Coruña, da man
de Kalina Pudzianowska, blogueira polaca afincada en Galicia,
chéganos unha web que serve para abrir múltiples camiños ao noso
pulo creativo. Chámase cartulina.es
e trátase dun blog “producido diariamente dende A Coruña para
mundo”, inaugurado co comezo do ano e rexistrando xa (dende
xaneiro) unha cota de 7.000 visitas mensuais. Segundo nos conta
Kalina, o proxecto “nace coa motivación de crear dende Galicia
unha comunidade de usuarios envorcados nas manualidades”.
Porén, os obxectivos van
alén disto. O que se busca dende o blog é, precisamente, sacalo de
si mesmo. Ou sexa, reunir unha masa de internautas-lectores abonda
como para organizar, periodicamente, todo tipo de eventos na nosa
terra relacionados coa creatividade. Outro dos obxectivos, sinala
Kalina, é impulsar un colectivo activo de usuarios que xeren
contidos “e promovan novas oportunidades laborais”. Polo que
respecta á web en si mesma, ao seu miolo, dicir que unha coidada
iniciativa blogueira directamente encamiñada a sacar o
artesán ou artista que levamos dentro. A través de diferentes
propostas renovadas cada pouco (xardíns para cobaias, bonecos de
feltro, chaveiros feitos a man, etc), ofrécense detallados textos
explicativos, achegados do xeito máis ameno posíbel, e un bo feixe
de fotografías descritivas co fin de facilitar os traballos dos
internautas.