En marcha na Rede un libro colectivo para loitar polo dereito á escolarización das nenas
martes, 8 de marzo do 2011
A Campaña Mundial pola Educación é unha iniciativa
destinada a favorecer a escolarización, facendo especial fincapé nos países máis
pobres, que xuntos (e contando tamén coas cifras que achegan o resto dos países,
xa que nin sequera os ricos se salvan) suman un panorama de case 70 millóns de
nenas e nenos sen posibilidade de recibir formación (máis da metade, nenas). A
Campaña, que o ano pasado recadou 18 millóns de sinaturas de apoio a través da
súa iniciativa 1Gol pola Educación,
volve mobilizarse estes días para esixir un meirande esforzo político para
rematar coa desigualdade de xénero no acceso á educación. Baixo o lema A educación non é un conto: polos dereitos
das nenas e mulleres, a nova iniciativa apóiase en boa medida nas opcións
da Internet social que se impón.
A mobilización, que se vai desenvolver entre o 11 e o 17
do vindeiro mes de abril, coincidindo coa Semana de acción Mundial pola Educación
(SAME), visibilizarase a través da elaboración colectiva dun libro en liña de
contos escritos polos integrantes das nosas comunidades educativas (alumnas/os,
mestres, investigadores, etc) que servirá para dar conta das vantaxes da
educación no desenvolvemento persoal das mulleres e das nenas.
Os contos, como se dixo, estarán á vista en Internet na
web da Campaña. Os relatos, ademais,
serán o miolo das actividades proxectadas para a nosa terra. “Nestes
actos”, informa o equipo galego da Campaña, “contarase coa participación de diferentes representantes dos gobernos
locais, autonómicos e do goberno estatal para recordarlles o seu compromiso de
destinar os recursos necesarios para garantir a educación básica para todos e
todas”. A achega dixital do libro colectivo complementarase coa posta en
marcha da nova web da Campaña, operativa a partir do 21 de marzo no dominio www.cme-espana.org e con múltiples
recursos para promover a participación das/os internautas e establecer conexión
directa coas redes sociais. “Coa mesma URL”,
comentan os responsables da plataforma “esperamos
incrementar o número de visitas e o tráfico de contido pero, en especial,
agardamos que resulte máis estética, máis intuitiva e máis navegable a prol de
fortalecer e multiplicar a nosa mensaxe do dereito á educación para todos e
todas”.
Que é A Campaña
Mundial pola Educación?
A Campaña Mundial pola Educación (Global Campaing for Education) é unha coalición internacional
formada por ONG, sindicatos do ámbito educativo, centros escolares e movementos
sociais de moi diverso signo. Todos coincidimos en reclamar o cumprimento
íntegro dos compromisos do "Cumio de Dakar" do ano 2000, onde a
comunidade internacional se comprometeu a garantir o acceso a unha educación de
calidade para todos e todas antes do ano 2015.
Actualmente, malia que a educación é un dereito
fundamental, e é imprescindible para romper o círculo da pobreza, hai 69
millóns de nenos e nenas sen escolarizar e 759 millóns de persoas adultas que
non teñen competencias básicas de lectura.